yaaden

hidāyat jis tarah gum-gashtagāñ ko hai sitāroñ se

vafādārī hai jaisī bādaloñ ko kohsāroñ se

kashish jaisī hai maujoñ ko samundar ke kināroñ se

samand-e-bād-pā kī jo itā.at hai savāroñ se

qalam ko jo ravānī hai musannif ke ishāroñ se

anādil ko hai jaisī unsiyat rangīñ bahāroñ se

tirā gum-gashta bādal huuñ samand-e-bād-pā huuñ maiñ

tirī mauj-o-qalam huuñ andalīb-e-bā-vafā huuñ maiñ

tirī yādoñ se hotī hai kuchh aisī kaifiyat paidā

ki maiñ huuñ har-nafas shaidā dil-o-jāñ se tirā shaidā

hidayat jis tarah gum-gashtagan ko hai sitaron se

wafadari hai jaisi baadalon ko kohsaron se

kashish jaisi hai maujon ko samundar ke kinaron se

samand-e-baad-pa ki jo itaat hai sawaron se

qalam ko jo rawani hai musannif ke ishaaron se

anadil ko hai jaisi unsiyat rangin bahaaron se

tera gum-gashta baadal hun samand-e-baad-pa hun main

teri mauj-o-qalam hun andalib-e-ba-wafa hun main

teri yaadon se hoti hai kuchh aisi kaifiyat paida

ki main hun har-nafas shaida dil-o-jaan se tera shaida