yaaden

mahfūz haiñ yādoñ meñ abhī tak vo ba-tadrīj

dohrātā hai ab tak vo fasāne dil-e-nākām

āġhāz-e-mohabbat ke vo biite hue lamhāt

vo hashr-ba-dil sā’at-e-dīdār kā hangām

vo sarv-o-sanobar kī tarah qāmat-e-zebā

sīmāb kī mānind vo raftār kā 'ālam

lahje meñ vo andāz nasīm-e-saharī kā

vo phuul kī sūrat lab-o-ruḳhsār kā 'ālam

hai yaad tujhe bhī ki nahīñ ai mirī mahbūb

jab baam se utrā thā tire husn kā ḳhurshīd

vo arz-e-tamanna pe tire dil kā dhḌaknā

vo nīchī nazar se mire jazbāt kī tā.īd

vo vaqt bhī hai yaad ham-āhang the do dil

ḳhāmosh nigāhoñ se thā iqrār vafā kā

aayā nahīñ go lafz mohabbat kā zabāñ par

har baat se hone lagā iz.hār vafā kā

phir tujh se judā ho ke guzāre haiñ vo din bhī

vo bhī dil-e-betāb ne dekhe haiñ zamāne

kyā kyā tire dīdār ko tarsī haiñ nigāheñ

kyā kyā na mulāqāt ke DhūñDe haiñ bahāne

tanhā.ī meñ har shab vo sajā.ī huī mahfil

vo tere tasavvur meñ guzārī huī rāteñ

ḳhushbū kā tirī zikr-e-hasīñ bād-e-sabā se

vo chāñd sitāroñ se tire husn kī bāteñ

phir dam se tire ye dil-e-vīrāñ huā ābād

phir terī rifāqat ne ka.ī chheḌ diye saaz

duniyā ko magar kab thī gavārā ye rifāqat

ab dāġh-e-judā.ī hai faqat hamdam-o-dam-sāz

dil aaj TaTolā hai to ye 'uqda khulā hai

sach ye hai ki maiñ ne tujhe chāhā hī nahīñ thā

kuchh is meñ mirā zauq-e-parastish bhī thā shāmil

puujā thā tujhe sirf sarāhā hī nahīñ thā

mahfuz hain yaadon mein abhi tak wo ba-tadrij

dohraata hai ab tak wo fasane dil-e-nakaam

aaghaz-e-mohabbat ke wo bite hue lamhat

wo hashr-ba-dil sa’at-e-didar ka hangam

wo sarw-o-sanobar ki tarah qamat-e-zeba

simab ki manind wo raftar ka 'alam

lahje mein wo andaz nasim-e-sahari ka

wo phul ki surat lab-o-ruKHsar ka 'alam

hai yaad tujhe bhi ki nahin ai meri mahbub

jab baam se utra tha tere husn ka KHurshid

wo arz-e-tamanna pe tere dil ka dhDakna

wo nichi nazar se mere jazbaat ki taid

wo waqt bhi hai yaad ham-ahang the do dil

KHamosh nigahon se tha iqrar wafa ka

aaya nahin go lafz mohabbat ka zaban par

har baat se hone laga izhaar wafa ka

phir tujh se juda ho ke guzare hain wo din bhi

wo bhi dil-e-betab ne dekhe hain zamane

kya kya tere didar ko tarsi hain nigahen

kya kya na mulaqat ke DhunDe hain bahane

tanhai mein har shab wo sajai hui mahfil

wo tere tasawwur mein guzari hui raaten

KHushbu ka teri zikr-e-hasin baad-e-saba se

wo chand sitaron se tere husn ki baaten

phir dam se tere ye dil-e-viran hua aabaad

phir teri rifaqat ne kai chheD diye saz

duniya ko magar kab thi gawara ye rifaqat

ab dagh-e-judai hai faqat hamdam-o-dam-saz

dil aaj TaTola hai to ye 'uqda khula hai

sach ye hai ki main ne tujhe chaha hi nahin tha

kuchh is mein mera zauq-e-parastish bhi tha shamil

puja tha tujhe sirf saraha hi nahin tha