yaaden

mujhe ab yaad nahīñ rahtā

maiñ aksar bhuul jaatī huuñ

terī yādeñ jo bikhrī thiiñ

mere kamre meñ yuuñ har-sū

sameT kar ek kone meñ rakh diyā hai

kabhī ye chādar tale simaT kar soī rahtīñ thiiñ

kabhī takiye tale dubkī paḌī rahtīñ

par ab yaad nahīñ rahtā ki ghar ke kis kone meñ

unheñ rakh kar maiñ bhuul baiThī huuñ

kabhī sub.h yahī yādeñ

palkoñ pe machaltī thiiñ

kabhī shabnam meñ nahā kar

ashkoñ meñ ġhota-zan hotīñ

magar ab aisā nahīñ rahā

ab yahī yādeñ zehn par baar lagtī haiñ

jinheñ maiñ phuul samjhī thī

vo mujh ko ḳhaar lagtī haiñ

sochtī huuñ ki in yādoñ se

dāman kaise bachā.ūñ

fuzūl yādoñ se kaise

apnā pīchhā chhuḌā.ūñ

mujhe ab yaad nahin rahta

main aksar bhul jati hun

teri yaaden jo bikhri thin

mere kamre mein yun har-su

sameT kar ek kone mein rakh diya hai

kabhi ye chadar tale simaT kar soi rahtin thin

kabhi takiye tale dubki paDi rahtin

par ab yaad nahin rahta ki ghar ke kis kone mein

unhen rakh kar main bhul baiThi hun

kabhi subh yahi yaaden

palkon pe machalti thin

kabhi shabnam mein naha kar

ashkon mein ghota-zan hotin

magar ab aisa nahin raha

ab yahi yaaden zehn par bar lagti hain

jinhen main phul samjhi thi

wo mujh ko KHar lagti hain

sochti hun ki in yaadon se

daman kaise bachaun

fuzul yaadon se kaise

apna pichha chhuDaun