yaaden

vo lamhe kitne dilkash the

vo ghaḌiyāñ kitnī pyārī thiiñ

jug jug kī do pyāsī rūheñ

be-ḳhauf-o-ḳhatar anjān milīñ

ik peḌ kī ThanDī chhāñv tale

vo vaqt hai ab tak yaad mujhe

jab jang ke bādal chhā.e the

dushman sarhad par aa.e the

kuchh tank top bhī laa.e the

phir to vo muñh kī khaa.e the

bhārat ke viir sipāhī se

vo vaqt hai ab tak yaad mujhe

majbūr-o-nihattī ye jantā

jab maañg rahī thī haq apnā

daana paanī roTī kapḌā

le kar lāThī DañDā bhālā

maġhrūr sipāhī TuuT paḌe

vo vaqt hai ab tak yaad mujhe

jab bhuuk palī dahqānoñ meñ

jab aag lagī khaliyānoñ meñ

jab maañg baḌhī sāmānoñ meñ

rū-posh hue tah-ḳhānoñ meñ

baqqāl ke saare bhaag khule

vo vaqt hai ab tak yaad mujhe

jiine kā har ik sāmān bikā

aflās-zada insān bikā

kauḌī kauḌī īmān bikā

saste dāmoñ abhīmān bikā

phir paap ke chashme phuuT paḌe

vo vaqt hai ab tak yaad mujhe

wo lamhe kitne dilkash the

wo ghaDiyan kitni pyari thin

jug jug ki do pyasi ruhen

be-KHauf-o-KHatar anjaan milin

ek peD ki ThanDi chhanw tale

wo waqt hai ab tak yaad mujhe

jab jang ke baadal chhae the

dushman sarhad par aae the

kuchh tank top bhi lae the

phir to wo munh ki khae the

bhaarat ke wir sipahi se

wo waqt hai ab tak yaad mujhe

majbur-o-nihatti ye janta

jab mang rahi thi haq apna

dana pani roTi kapDa

le kar laThi DanDa bhaala

maghrur sipahi TuT paDe

wo waqt hai ab tak yaad mujhe

jab bhuk pali dahqanon mein

jab aag lagi khaliyanon mein

jab mang baDhi samanon mein

ru-posh hue tah-KHanon mein

baqqal ke sare bhag khule

wo waqt hai ab tak yaad mujhe

jine ka har ek saman bika

aflas-zada insan bika

kauDi kauDi iman bika

saste damon abhiman bika

phir pap ke chashme phuT paDe

wo waqt hai ab tak yaad mujhe