yaft aur nayaft ka masala

yaaft aur nāyāft meñ

uljhe hue

ye sochte rahte haiñ ham aksar

ki paanā aap apne ko

nahīñ āsāñ

mahd se tā-lahad ham DhūñDte rahte haiñ ḳhud ko

kaun jaane kab hamārī yaaft kā lamha

kisī pāras kī sūrat ham se Takrā.e

na jaane kab ham apne aap ko pā leñ

magar ye bhī zarūrī to nahīñ hogā ki phir se

gum na kar deñ ḳhud ko is jangal meñ ik tinke kī sūrat

ki kho jaanā muqaddar hai

amal ye

ḳhud ko khone aur paane kā amal

jaarī hai aur jaarī rahegā

yaaft aur nāyāft ke in marhaloñ se

ham guzarte hī raheñge

aur ik din

thakan baḌh jā.egī itnī

ki phir ye yaaft aur nāyāft kā

ehsās hī jaatā rahegā

magar is yaaft aur nāyāft kī uljhan meñ

ik lazzat bhī hai

aur ham isī uljhan ko siine se lagā.e

DhūñDte rahte haiñ ḳhud ko

kab hamārī yaaft kā lamha

kisī pāras kī sūrat ham se Takrā.e

hameñ kundan banā de

yaft aur nayaft mein

uljhe hue

ye sochte rahte hain hum aksar

ki pana aap apne ko

nahin aasan

mahd se ta-lahad hum DhunDte rahte hain KHud ko

kaun jaane kab hamari yaft ka lamha

kisi paras ki surat hum se Takrae

na jaane kab hum apne aap ko pa len

magar ye bhi zaruri to nahin hoga ki phir se

gum na kar den KHud ko is jangal mein ek tinke ki surat

ki kho jaana muqaddar hai

amal ye

KHud ko khone aur pane ka amal

jari hai aur jari rahega

yaft aur nayaft ke in marhalon se

hum guzarte hi rahenge

aur ek din

thakan baDh jaegi itni

ki phir ye yaft aur nayaft ka

ehsas hi jata rahega

magar is yaft aur nayaft ki uljhan mein

ek lazzat bhi hai

aur hum isi uljhan ko sine se lagae

DhunDte rahte hain KHud ko

kab hamari yaft ka lamha

kisi paras ki surat hum se Takrae

hamein kundan bana de