yas ke parde mein

najāt ġham se kabhī milī hai na zindagī bhar kabhī milegī

taḌap ke niklegī jān-e-muztar agar kisī din ḳhushī milegī

jo rāzdārī vatan meñ pinhāñ thā kaun is ko na jāntā thā

ki ik taraf ḳhvājgī milegī to ik taraf bandagī milegī

yahī hai jamhūriyat ke ma.anī to phir ġhulāmī kā kaisā shikva

kisī ko ġham hogā aur kisī ko masarrat-e-dā.imī milegī

kise ḳhabar thī ki inqilāb-e-zamāna badlegā karvaT aisī

jo kāfirī ko faroġh degā usī ko paiġhambarī milegī

jo mulk meñ inqilāb aaya to qatl-o-ġhārat ke saath aaya

samajh rahe the samajhne vaale ki ik na.ī zindagī milegī

udāsiyoñ ne ujaaḌ Daalā kuchh is tarah baaġh aarzū kā

na tāza-dam is meñ gul mileñge na muskurātī kalī milegī

zamāna vāqif na thā kuchh is se ki aisā qaht-e-girāñ paḌegā

jo chiiz milnī thī chaar paisoñ ko ashrafī par vahī milegī

ye kyā ḳhabar thī ki fāqa-mastī meñ satr-poshī bhī hogī mushkil

amaañ kī jab hoñgī iltijā.eñ to qatl-o-ġhārat-garī milegī

chhupegā insāniyat kā sūraj hujūm-e-kulfat kī āñdhiy.oñ meñ

baḌhegā zauq-e-siyāhkārī diloñ meñ bhī tīrgī milegī

magar ye fitrat kī inqilābī numā.isheñ mujh se kah rahī haiñ

inhī añdheroñ se bazm-e-gītī ko ek din raushnī milegī

najat gham se kabhi mili hai na zindagi bhar kabhi milegi

taDap ke niklegi jaan-e-muztar agar kisi din KHushi milegi

jo raazdari watan mein pinhan tha kaun is ko na jaanta tha

ki ek taraf KHwajgi milegi to ek taraf bandagi milegi

yahi hai jamhuriyat ke mani to phir ghulami ka kaisa shikwa

kisi ko gham hoga aur kisi ko masarrat-e-daimi milegi

kise KHabar thi ki inqilab-e-zamana badlega karwaT aisi

jo kafiri ko farogh dega usi ko paighambari milegi

jo mulk mein inqilab aaya to qatl-o-ghaarat ke sath aaya

samajh rahe the samajhne wale ki ek nai zindagi milegi

udasiyon ne ujaD Dala kuchh is tarah bagh aarzu ka

na taza-dam is mein gul milenge na muskuraati kali milegi

zamana waqif na tha kuchh is se ki aisa qaht-e-giran paDega

jo chiz milni thi chaar paison ko ashrafi par wahi milegi

ye kya KHabar thi ki faqa-masti mein satr-poshi bhi hogi mushkil

aman ki jab hongi iltijaen to qatl-o-ghaarat-gari milegi

chhupega insaniyat ka suraj hujum-e-kulfat ki aandhiyon mein

baDhega zauq-e-siyahkari dilon mein bhi tirgi milegi

magar ye fitrat ki inqilabi numaishen mujh se kah rahi hain

inhi andheron se bazm-e-giti ko ek din raushni milegi