yad-e-baiza

mirī hathelī ke saañp kab tak Daseñge mujh ko

mirī hathelī ke saañp jo ab

mirī ragoñ meñ utar chuke haiñ

badan ko zanjīr kar chuke haiñ

maiñ ḳhvāb dekhūñ to koī āñkhoñ pe haath rakh de

qadam uThā.ūñ to koī mere qadam pakḌe

palaT ke dekhūñ to koī pīchhe na koī aage

bas ek saaya

mirī haqīqat kā ik kināya

mirī haqīqat ki meñ añdhere kī rahnumā.ī meñ chal rahā huuñ

azal se ik sāmrī ke sāñpoñ meñ pal rahā huuñ

mirī hathelī ki jis meñ raushan

vo aag bhī hai vo nuur bhī hai

jo dast-e-mūsā hai tuur bhī hai

jo is asā kī talāsh meñ hai

jo har tahī-dast kī matā-e-girāñ-bahā hai

jo kushtagān-e-tilism-e-zar kī hayāt-e-tāza kā mo.ajiza hai

jo ahd-e-hāzir ke sāhiroñ

aur un ke pāniyoñ ke vāste

zarbat-e-qazā hai

meri hatheli ke sanp kab tak Dasenge mujh ko

meri hatheli ke sanp jo ab

meri ragon mein utar chuke hain

badan ko zanjir kar chuke hain

main KHwab dekhun to koi aankhon pe hath rakh de

qadam uThaun to koi mere qadam pakDe

palaT ke dekhun to koi pichhe na koi aage

bas ek saya

meri haqiqat ka ek kinaya

meri haqiqat ki mein andhere ki rahnumai mein chal raha hun

azal se ek samri ke sanpon mein pal raha hun

meri hatheli ki jis mein raushan

wo aag bhi hai wo nur bhi hai

jo dast-e-musa hai tur bhi hai

jo is asa ki talash mein hai

jo har tahi-dast ki mata-e-giran-baha hai

jo kushtagan-e-tilism-e-zar ki hayat-e-taza ka moajiza hai

jo ahd-e-hazir ke sahiron

aur un ke paniyon ke waste

zarbat-e-qaza hai