yahi peshani ki jis par koi silwaT bhi nahin

yahī peshānī ki jis par koī silvaT bhī nahīñ

yahī raftār ki jis meñ koī aahaT bhī nahīñ

haañ yahī haat jo ab tak mire hātoñ meñ nahīñ

yahī añgusht ki hairat se jo dāñtoñ meñ nahīñ

yahī be-dāġh sā chehra hai jo taḳhayyul meñ thā

jaise ik saada varaq bhī koī injīl meñ thā

yahī malbūs jo is tan pe kahāñ Thahrā hai

ā.īne par bhī kahīñ āb-e-ravāñ Thahrā hai

sochtā huuñ ki yahī jism yahī jism key aañch

yahī shaffāf badan jaise tarāshā huā kāñch

maiñ ne dekhā hai kahīñ ḳhvāb bhī ho saktā hai

ya.anī ik dasht tah-e-āb bhī ho saktā he

yahi peshani ki jis par koi silwaT bhi nahin

yahi raftar ki jis mein koi aahaT bhi nahin

han yahi hat jo ab tak mere haton mein nahin

yahi angusht ki hairat se jo danton mein nahin

yahi be-dagh sa chehra hai jo taKHayyul mein tha

jaise ek sada waraq bhi koi injil mein tha

yahi malbus jo is tan pe kahan Thahra hai

aaine par bhi kahin aab-e-rawan Thahra hai

sochta hun ki yahi jism yahi jism key aanch

yahi shaffaf badan jaise tarasha hua kanch

main ne dekha hai kahin KHwab bhi ho sakta hai

yani ek dasht tah-e-ab bhi ho sakta he