ye achchhe log hain

ye achchhe log haiñ in se na milnā

aur milnā bhī to in kī āstīneñ dekh lenā

ye achchhe log haiñ aur be-shikan shā.istagī in kā muqaddar hai

ye achchhe log haiñ aur be-sadā shorīdgī in kā muqaddar hai

lapakte pāniyoñ kī āḳhirī āsūdgī in kā muqaddar hai

ye achchhe log haiñ jab shaam hotī hai

to be-āvāz galiyoñ ke sahāre

kunj-e-goyā.ī meñ apnī aag lene jaate haiñ

aur rāste bhar ḳhud ko paiġhambar samajhte haiñ

ye achchhe log haiñ aur aag in kā mas.ala hai

ye achchhe log haiñ sadiyoñ se un kī maa.eñ kahtī aa rahī haiñ

paḌosan aag denā

dhuāñ dete hue chūlhe kī sub.heñ

āñganoñ meñ phailte saa.e

kiranjī dhuup bhūrī aañkh vaalī laḌkiyoñ jaisī

vafā nā-āshnā shāmeñ

tave ko señkte ThiThure hue haath

aur rātoñ kī ulajhtī silvaTeñ

jismoñ kī āsūda salībeñ

aspatāloñ meñ janm detī huī martī huī maa.eñ

ye shamshānoñ kī bevā.eñ

ka.ī sadiyoñ se dohrā.eñ

paḌosan aag denā

paḌosan aag ḳhamyāza

unhī rastoñ kā āvāza

unhī rastoñ pe chalnā aur yahī kahnā

ye achchhe log haiñ in se na milnā

aur milnā bhī to in kī āstīneñ dekh lenā

ye achchhe log hain in se na milna

aur milna bhi to in ki aastinen dekh lena

ye achchhe log hain aur be-shikan shaistagi in ka muqaddar hai

ye achchhe log hain aur be-sada shoridgi in ka muqaddar hai

lapakte paniyon ki aaKHiri aasudgi in ka muqaddar hai

ye achchhe log hain jab sham hoti hai

to be-awaz galiyon ke sahaare

kunj-e-goyai mein apni aag lene jate hain

aur raste bhar KHud ko paighambar samajhte hain

ye achchhe log hain aur aag in ka masala hai

ye achchhe log hain sadiyon se un ki maen kahti aa rahi hain

paDosan aag dena

dhuan dete hue chulhe ki subhen

aanganon mein phailte sae

kiranji dhup bhuri aankh wali laDkiyon jaisi

wafa na-ashna shamen

tawe ko senkte ThiThure hue hath

aur raaton ki ulajhti silwaTen

jismon ki aasuda saliben

aspatalon mein janm deti hui marti hui maen

ye shamshanon ki bewaen

kai sadiyon se dohraen

paDosan aag dena

paDosan aag KHamyaza

unhi raston ka aawaza

unhi raston pe chalna aur yahi kahna

ye achchhe log hain in se na milna

aur milna bhi to in ki aastinen dekh lena