ye aurten

soch lo soch lo jiine kā ye andāz nahīñ

apnī bāñhoñ kā yahī rañg numāyāñ na karo

husn ḳhud zīnat-e-mahfil hai charāġhāñ na karo

nīm-uryāñ sā badan aur ubharte siine

tañg aur reshmī malbūs dhaḌakte siine

taar jab TuuT ga.e saaz koī saaz nahīñ

tum to aurat ho magar jins-e-girāñ ban na sakīñ

aur āñkhoñ kī ye gardish ye chhalakte hue jaam

aur kūlhoñ kī lachak mast chakoroñ kā ḳhirām

sham.a jo der se jaltī hai na bujhne paa.e

kārvāñ ziist kā is tarah na luTne paa.e

tum to ḳhud apnī hī manzil kā nishāñ ban na sakīñ

raat kuchh bhiig chalī duur sitāre TuuTe

tum to aurat hī ke jazbāt ko kho detī ho

tāliyoñ kī isī naddī meñ Dubo detī ho

muskurāhaT sar-e-bāzār bikā kartī hai

zindagī yaas se qadmoñ pe jhukā kartī hai

aur sailāb umaDtā hai sahāre TuuTe

duur haT jaao nigāheñ bhī sulag uTThī haiñ

varzishoñ kī ye numā.ish tū bahut dekh chukā

pinDaliyoñ kī ye numā.ish tū bahut dekh chukā

jaao ab dūsre haivān yahāñ ā.eñge

bhes badle hue insān yahāñ ā.eñge

dekhtī kyā ho ye bāñheñ bhī sulag uTThī haiñ

soch lo soch lo jiine kā ye andāz nahīñ

soch lo soch lo jine ka ye andaz nahin

apni banhon ka yahi rang numayan na karo

husn KHud zinat-e-mahfil hai charaghan na karo

nim-uryan sa badan aur ubharte sine

tang aur reshmi malbus dhaDakte sine

tar jab TuT gae saz koi saz nahin

tum to aurat ho magar jins-e-giran ban na sakin

aur aankhon ki ye gardish ye chhalakte hue jam

aur kulhon ki lachak mast chakoron ka KHiram

shama jo der se jalti hai na bujhne pae

karwan zist ka is tarah na luTne pae

tum to KHud apni hi manzil ka nishan ban na sakin

raat kuchh bhig chali dur sitare TuTe

tum to aurat hi ke jazbaat ko kho deti ho

taliyon ki isi naddi mein Dubo deti ho

muskurahaT sar-e-bazar bika karti hai

zindagi yas se qadmon pe jhuka karti hai

aur sailab umaDta hai sahaare TuTe

dur haT jao nigahen bhi sulag uTThi hain

warzishon ki ye numaish tu bahut dekh chuka

pinDaliyon ki ye numaish tu bahut dekh chuka

jao ab dusre haiwan yahan aaenge

bhes badle hue insan yahan aaenge

dekhti kya ho ye banhen bhi sulag uTThi hain

soch lo soch lo jine ka ye andaz nahin