ye dard ab ke siwa hai had se

vo dard bhī thā sivā hadoñ se

tumhārī aamad kā jis meñ muzhda chhupā huā thā

vo dard rag rag kī chīḳh ban kar sadā huā thā

to aañkh ḳhushiyoñ se nam huī thī

zabāñ se shukr-e-ḳhudā thā niklā

zamīñ kā TukḌā jo zer-e-pā thā

huā thā jannat

ki apnī takmīl par huī thī maiñ sar-ba-sajda

magar mirī jaañ

vo ḳhvāb mausam guzar chukā hai

hazār rātoñ ke ratjagoñ kā hisāb kaisā

jise ki apne lahū se sīñchā

shajar banāyā

vo merā kab thā

azaab kaise utar rahe haiñ

yā ḳhvāb āñkhoñ meñ mar rahe haiñ

rafāqatoñ meñ ye hijratoñ kī mahak ghulī kyuuñ

masāfatoñ meñ thakan sī kyuuñ jism-o-jāñ meñ utrī

koī batā.e

ki god bharne ke ba.ad ḳhālī ye haath kyuuñ haiñ

ye kaisā chehra hai zindagī kā

laboñ pe harf-e-duā hai sākit

maiñ phir se ik baar dard lahroñ kī zad pe Thahrī ye sochtī huuñ

ki jis ko banñe meñ umr kaaTī

vo ḳhvāb-e-mausam guzar chuke haiñ

ġhubār āñkhoñ meñ bhar chuke haiñ

naved detā ho koī lamha

koī pukāre ki maiñ yahīñ huuñ

palaT ke aa.eñ vo paañv jis ke liye zamīñ huuñ

nahīñ hai koī sadā nahīñ hai

magar mirī jaañ ye dard ab ke sivā hai had se

wo dard bhi tha siwa hadon se

tumhaari aamad ka jis mein muzhda chhupa hua tha

wo dard rag rag ki chiKH ban kar sada hua tha

to aankh KHushiyon se nam hui thi

zaban se shukr-e-KHuda tha nikla

zamin ka TukDa jo zer-e-pa tha

hua tha jannat

ki apni takmil par hui thi main sar-ba-sajda

magar meri jaan

wo KHwab mausam guzar chuka hai

hazar raaton ke ratjagon ka hisab kaisa

jise ki apne lahu se sincha

shajar banaya

wo mera kab tha

azab kaise utar rahe hain

ya KHwab aankhon mein mar rahe hain

rafaqaton mein ye hijraton ki mahak ghuli kyun

masafaton mein thakan si kyun jism-o-jaan mein utri

koi batae

ki god bharne ke baad KHali ye hath kyun hain

ye kaisa chehra hai zindagi ka

labon pe harf-e-dua hai sakit

main phir se ek bar dard lahron ki zad pe Thahri ye sochti hun

ki jis ko banne mein umr kaTi

wo KHwab-e-mausam guzar chuke hain

ghubar aankhon mein bhar chuke hain

nawed deta ho koi lamha

koi pukare ki main yahin hun

palaT ke aaen wo panw jis ke liye zamin hun

nahin hai koi sada nahin hai

magar meri jaan ye dard ab ke siwa hai had se