ye girta hua shahr mera nahin

ye aag aur ḳhuuñ ke samundar meñ girtā huā shahr merā nahīñ

havā se ulajhtā huā maiñ chalā jā rahā huuñ añdherā hai gahrā ghanā be-amāñ

raat ke dasht meñ tere mere makāñ

duur hote chale jā rahe haiñ

lahū ke ujāle bhī ma.adūm haiñ

aur tārīk gumbad meñ ma.asūm rūhoñ ke kohrām meñ

be-sadā āsmāñ kī taraf

ḳhuuñ meñ luThḌe hue haath uThte haiñ tahlīl ho jaate haiñ

aur kahīñ duur apnī fasīloñ ke andar bikhartī huī

nā-murādoñ kī bastī ke uupar

havā se ulajhtā huā maiñ uḌā jā rahā huuñ añdherā hai gahrā ghanā be-amāñ

maiñ bulātā huuñ āvāz detā huuñ ab us hasīñ shahr ko

jo purānī zamīnoñ ke nīche kahīñ dafn hai

koī āvāz kānoñ meñ aatī nahīñ hai

maiñ shāyad purānī zamīnoñ ke nīche bahut duur nīche kahīñ dafn huuñ

ḳhuuñ meñ luThḌe hue haath

tārīk gumbad

ye andhī havā

phaḌphaḌātā huā ek zaḳhmī parinda

kahīñ duur apnī fasīloñ ke andar bikhartī huī

nā-murādoñ kī bastī ke uupar

maiñ jalte paroñ se uḌā jā rahā huuñ

ye aag aur ḳhuuñ ke samundar meñ girtā huā shahr merā nahīñ hai

ye aag aur KHun ke samundar mein girta hua shahr mera nahin

hawa se ulajhta hua main chala ja raha hun andhera hai gahra ghana be-aman

raat ke dasht mein tere mere makan

dur hote chale ja rahe hain

lahu ke ujale bhi madum hain

aur tarik gumbad mein masum ruhon ke kohram mein

be-sada aasman ki taraf

KHun mein luThDe hue hath uThte hain tahlil ho jate hain

aur kahin dur apni fasilon ke andar bikharti hui

na-muradon ki basti ke upar

hawa se ulajhta hua main uDa ja raha hun andhera hai gahra ghana be-aman

main bulata hun aawaz deta hun ab us hasin shahr ko

jo purani zaminon ke niche kahin dafn hai

koi aawaz kanon mein aati nahin hai

main shayad purani zaminon ke niche bahut dur niche kahin dafn hun

KHun mein luThDe hue hath

tarik gumbad

ye andhi hawa

phaDphaData hua ek zaKHmi parinda

kahin dur apni fasilon ke andar bikharti hui

na-muradon ki basti ke upar

main jalte paron se uDa ja raha hun

ye aag aur KHun ke samundar mein girta hua shahr mera nahin hai