ye hum kaun hain

ye ham kaun haiñ

vaqt kī shāh-rāhoñ pe nañge qadam

tez tez dhuup meñ

be-ridā be-amāñ

rāste meñ koī miil patthar nahīñ

aur havā-e-masāfat guzarte hue

ruk ke kahtī hai ye

koī manzil tumhārā muqaddar nahīñ

ye ham kaun haiñ

be-yaqīnī ke sāhil pe tanhā khaḌe

aañkh kī kashtiyāñ

pāniyoñ ke safar par ravāna huiiñ

duur tak

nīlgūñ

sabz paanī kā girdāb hai

vāpsī kā tasavvur bhī ab ḳhvāb hai

ḳhvāb hai

ye ham kaun haiñ

niiñd meñ jāgte

ḳhvāb meñ bhāgte

ḳhema-e-jāñ ko apne hī hāthoñ meñ thāme hue

jin ke kachche gharoñdoñ ko

be-vaqt kī bārisheñ khā ga.iiñ

sab sitam Dah ga.iiñ

ye ham kaun haiñ

sajda-gāh-e-mohabbat meñ jin kī jabīñ

sañg-e-dar ho ga.ī

mo'atabar ho ga.ī

aur hoñToñ pe harf-e-duā tak nahīñ

iltijā tak nahīñ

āsmānoñ kī khiḌkī khulī hai magar

ḳhāliq-e-shash-jihat

mālik-e-bahr-o-bar

dekh saktā nahīñ

pūchh saktā nahīñ

ye ham kaun haiñ

ye hum kaun hain

waqt ki shah-rahon pe nange qadam

tez tez dhup mein

be-rida be-aman

raste mein koi mil patthar nahin

aur hawa-e-masafat guzarte hue

ruk ke kahti hai ye

koi manzil tumhaara muqaddar nahin

ye hum kaun hain

be-yaqini ke sahil pe tanha khaDe

aankh ki kashtiyan

paniyon ke safar par rawana huin

dur tak

nilgun

sabz pani ka girdab hai

wapsi ka tasawwur bhi ab KHwab hai

KHwab hai

ye hum kaun hain

nind mein jagte

KHwab mein bhagte

KHema-e-jaan ko apne hi hathon mein thame hue

jin ke kachche gharondon ko

be-waqt ki barishen kha gain

sab sitam Dah gain

ye hum kaun hain

sajda-gah-e-mohabbat mein jin ki jabin

sang-e-dar ho gai

mo'atabar ho gai

aur honTon pe harf-e-dua tak nahin

iltija tak nahin

aasmanon ki khiDki khuli hai magar

KHaliq-e-shash-jihat

malik-e-bahr-o-bar

dekh sakta nahin

puchh sakta nahin

ye hum kaun hain