ye kaisi ghaDi hai

ye kaisī ghaḌī hai

zamānī tasalsul kā pahiya ghumā kar

yahāñ vaqt ko

jaise fitrat se kaaTā gayā hai

ḳhalījeñ jo rakhī ga.iiñ

nūr-o-zulmat ke mābain

in sab ko paaTā gayā hai

samay raat kā hai

magar dhuup

sūraj se le kar ijāzat

hamāre sirhāne khaḌī hai

ye kaisī ghaḌī hai

ye kaisī ghaḌī hai

ki jaise hamāre sirhāne kā

bilkul hamārī hī taqvīm kā

aur hamāre zamāne kā

ik taaq hai

jis pe koī muqaddas sahīfa nahīñ

ik riyā-kār mash.al dharī hai

musaffā surāhī meñ

aab samāvī nahīñ

reg-e-isyāñ bharī hai

bahishtī daraḳhtoñ ke

paak aur ras asmār meñ

koī nok-e-najāsat gaḌī hai

ḳhudāyā

tire nek bandoñ pe

uftād kaisī paḌī hai

ye kaisī ghaḌī hai

ye kaisi ghaDi hai

zamani tasalsul ka pahiya ghuma kar

yahan waqt ko

jaise fitrat se kaTa gaya hai

KHalijen jo rakhi gain

nur-o-zulmat ke mabain

in sab ko paTa gaya hai

samay raat ka hai

magar dhup

suraj se le kar ijazat

hamare sirhane khaDi hai

ye kaisi ghaDi hai

ye kaisi ghaDi hai

ki jaise hamare sirhane ka

bilkul hamari hi taqwim ka

aur hamare zamane ka

ek taq hai

jis pe koi muqaddas sahifa nahin

ek riya-kar mashal dhari hai

musaffa surahi mein

aab samawi nahin

reg-e-isyan bhari hai

bahishti daraKHton ke

pak aur ras asmar mein

koi nok-e-najasat gaDi hai

KHudaya

tere nek bandon pe

uftad kaisi paDi hai

ye kaisi ghaDi hai