ye kaisi KHalish hai

manoñ miTTī ke nīche dab ke

murda jism kā kyā hashr hotā hai

ba-ḳhūbī jāntā huuñ maiñ

sabhī kuchh ḳhaak ho jaatā hai

kuchh din meñ

ye sab kuchh jaan kar bhī

jaane ye kaisī ḳhalish hai

jo mujhe aksar

tire marqad pe laatī hai

kabhī nam-dīda kartī hai

kabhī Dhāras bañdhātī hai

kabhī yādoñ ke us rañgīn mahal meñ le ke jaatī hai

jahāñ par husn hai ra.anā.ī hai dilkash tarannum hai

jahāñ ek pur-kashish chehre pe sehar-āgīñ tabassum hai

jahāñ par narm lahje meñ hai mahv-e-guftugū koī

jahāñ par ek jahān-e-rañg-o-bū hai

yakāyak chauñk uThtā huuñ

ḳhayāloñ kī hasīñ duniyā se maiñ bāhar nikaltā huuñ

to phir ḳhud ko usī sahrā meñ paatā huuñ

jahāñ phailī kitābeñ haiñ

jahāñ bikhre rasā.il haiñ

jahāñ par har taraf tanhā.ī ke aaseb meñ

lipTī huī gahrī ḳhamoshī hai

manon miTTi ke niche dab ke

murda jism ka kya hashr hota hai

ba-KHubi jaanta hun main

sabhi kuchh KHak ho jata hai

kuchh din mein

ye sab kuchh jaan kar bhi

jaane ye kaisi KHalish hai

jo mujhe aksar

tere marqad pe lati hai

kabhi nam-dida karti hai

kabhi Dhaaras bandhati hai

kabhi yaadon ke us rangin mahal mein le ke jati hai

jahan par husn hai ranai hai dilkash tarannum hai

jahan ek pur-kashish chehre pe sehar-agin tabassum hai

jahan par narm lahje mein hai mahw-e-guftugu koi

jahan par ek jahan-e-rang-o-bu hai

yakayak chaunk uThta hun

KHayalon ki hasin duniya se main bahar nikalta hun

to phir KHud ko usi sahra mein pata hun

jahan phaili kitaben hain

jahan bikhre rasail hain

jahan par har taraf tanhai ke aaseb mein

lipTi hui gahri KHamoshi hai