ye kis ki sazish hai

ye kis kī sāzish hai

kis kā ḳhuun hai

ye kaun āmāda-e-junūñ hai

ye kaun aag aur ḳhuun kī holī jalā rahā hai

ye kaun tīroñ se kheltā hai

ye kaun ḳhanjar-ba-kaf

uḳhuvvat kā jism-e-nāzuk kuchal rahā hai

humaktī ma.asūmiyat ko nezoñ se chhedatā hai

laraztī insāniyat ke ḳheme jalā rahā hai

ki āsmāñ se muhīb sho.ale baras rahe haiñ

havā.eñ masmūm ho ga.ī haiñ

fazāoñ se ḳhuuñ Tapak rahā hai

zamīn kī chhātī ko chiir kar

nafratoñ kā laavā ubal paḌā hai

har ek zī-rūh ke badan par

ik an-kahe ḳhauf kī ridā hai

munāfiqat kī barahnagī kaise harf-e-āġhāz ban ga.ī hai

adū-e-dānish ko kis jafā-kār maslahat ne

kalīd-e-dānish sipurd kī hai

adū-e-insāniyat ko kin chīra-dastiyoñ ne

hukūmat-e-kurra-e-zamīñ sauñp dī hai jis ne

binā-e-tahzīb rauñd Daalī

ki rū-e-hastī se aks-e-tahzīb kī daraḳhshāñ matā.a kā nuur miT rahā hai

shabān-e-dījūr kī siyāhī umaD rahī hai

vo tīrgī hai har ek jūyā-e-haq se

tanvīr-e-ilm-o-irfāñ kināra-kash hai

ye kis ki sazish hai

kis ka KHun hai

ye kaun aamada-e-junun hai

ye kaun aag aur KHun ki holi jala raha hai

ye kaun tiron se khelta hai

ye kaun KHanjar-ba-kaf

uKHuwwat ka jism-e-nazuk kuchal raha hai

humakti masumiyat ko nezon se chhedata hai

larazti insaniyat ke KHeme jala raha hai

ki aasman se muhib shoale baras rahe hain

hawaen masmum ho gai hain

fazaon se KHun Tapak raha hai

zamin ki chhati ko chir kar

nafraton ka lawa ubal paDa hai

har ek zi-ruh ke badan par

ek an-kahe KHauf ki rida hai

munafiqat ki barahnagi kaise harf-e-aghaz ban gai hai

adu-e-danish ko kis jafa-kar maslahat ne

kalid-e-danish sipurd ki hai

adu-e-insaniyat ko kin chira-dastiyon ne

hukumat-e-kurra-e-zamin saunp di hai jis ne

bina-e-tahzib raund Dali

ki ru-e-hasti se aks-e-tahzib ki daraKHshan mataa ka nur miT raha hai

shaban-e-dijur ki siyahi umaD rahi hai

wo tirgi hai har ek juya-e-haq se

tanwir-e-ilm-o-irfan kinara-kash hai