ye matam-e-waqt ki ghaDi hai

Thahar ga.ī āsmāñ kī nadiyā

vo jā lagī hai ufaq kināre

udaas rañgoñ kī chāñd nayyā

utar ga.e sāhil-e-zamīñ par

sabhī khavayyā

tamām taare

ukhaḌ ga.ī saañs pattiyoñ kī

chalī ga.iiñ uuñgh meñ havā.eñ

gajar bajā hukm-e-ḳhāmushī kā

to chup meñ gum ho ga.iiñ sadā.eñ

sahar kī gorī kī chhātiyoñ se

Dhalak ga.ī tīrgī kī chādar

aur is bajā.e

bikhar ga.e us ke tan-badan par

nirās tanhā.iyoñ ke saa.e

aur us ko kuchh bhī ḳhabar nahīñ hai

kisī ko kuchh bhī ḳhabar nahīñ hai

kisī ko kuchh bhī ḳhabar nahīñ hai

ki din Dhale shahr se nikal kar

kidhar ko jaane kā ruḳh kiyā thā

na koī jāda, na koī manzil

kisī musāfir ko

ab dimāġh-e-safar nahīñ hai

ye vaqt zanjīr-e-roz-o-shab kī

kahīñ se ToTī huī kaḌī hai

ye mātam-e-vaqt kī ghaḌī hai

ye vaqt aa.e to be-irāda

kabhī kabhī maiñ bhī dekhtā huuñ

utaar kar zaat kā labāda

kahīñ siyāhī malāmatoñ kī

kaheñ pe gul-būTe ulfatoñ ke

kaheñ lakīreñ haiñ āñsuoñ kī

kaheñ pe ḳhūn-e-jigar ke dhabbe

ye chaak hai panja-e-adū kā

ye mohr hai yār-e-mehrbāñ kī

ye la.al lab-hā-e-mah-vishāñ ke

ye marhamat shaiḳh-e-bad-zabāñ kī

ye jāma-e-roz-o-shab-gazīda

mujhe ye pairāhan-e-darīda

aziiz bhii, nā-pasand bhī hai

kabhī ye farmān-e-josh-e-vahshat

ki noch kar is ko pheñk Daalo

kabhī ye isrār-e-harf-e-ulfat

ki chuum kar phir gale lagā lo

Thahar gai aasman ki nadiya

wo ja lagi hai ufaq kinare

udas rangon ki chand nayya

utar gae sahil-e-zamin par

sabhi khawayya

tamam tare

ukhaD gai sans pattiyon ki

chali gain ungh mein hawaen

gajar baja hukm-e-KHamushi ka

to chup mein gum ho gain sadaen

sahar ki gori ki chhatiyon se

Dhalak gai tirgi ki chadar

aur is bajae

bikhar gae us ke tan-badan par

niras tanhaiyon ke sae

aur us ko kuchh bhi KHabar nahin hai

kisi ko kuchh bhi KHabar nahin hai

kisi ko kuchh bhi KHabar nahin hai

ki din Dhale shahr se nikal kar

kidhar ko jaane ka ruKH kiya tha

na koi jada, na koi manzil

kisi musafir ko

ab dimagh-e-safar nahin hai

ye waqt zanjir-e-roz-o-shab ki

kahin se ToTi hui kaDi hai

ye matam-e-waqt ki ghaDi hai

ye waqt aae to be-irada

kabhi kabhi main bhi dekhta hun

utar kar zat ka labaada

kahin siyahi malamaton ki

kahen pe gul-buTe ulfaton ke

kahen lakiren hain aansuon ki

kahen pe KHun-e-jigar ke dhabbe

ye chaak hai panja-e-adu ka

ye mohr hai yar-e-mehrban ki

ye lal lab-ha-e-mah-wishan ke

ye marhamat shaiKH-e-bad-zaban ki

ye jama-e-roz-o-shab-gazida

mujhe ye pairahan-e-darida

aziz bhi, na-pasand bhi hai

kabhi ye farman-e-josh-e-wahshat

ki noch kar is ko phenk Dalo

kabhi ye israr-e-harf-e-ulfat

ki chum kar phir gale laga lo