ye mera KHwab nahin

udāsī kī jhilmil jhiil ke paar

maiñ ne dekhā

tumhārī laal chūḌiyāñ sabz hañsī hañs rahī thiiñ

os kī ek qurmuzī buuñd

tumhārī peshānī par damak rahī thī

ḳhush-ḳhvābī ke nāḳhunoñ se tum

andeshoñ kī girheñ khol rahī thiiñ

chāñd kī namī se

imkān ke be-kanār panne par

kuchh likh rahī thiiñ tumhārī uñgliyāñ

aur tumhāre paañv ke nīche

dhartī kī jhāñjhan baj rahī thī

aur ye merā vahm nahīñ

ki prithvī par kahīñ jab chāñd

ek bachche ke saath dauḌ rahā thā

tum havā se apnā haath chhuḌā kar

ek sajī huī chaukhaT meñ dāḳhil

ho ga.ī thiiñ

aur ye merā ḳhvāb nahīñ

ki sūraj jab

aadhe āsmān meñ chamak rahā thā

apnī chūḌiyāñ apnī bundī

apne andeshe apnī uñgliyāñ

apne haath aur apne hoñT

sab utaar kar

tum ne

aañkh se aañkh jalā.ī thī

jaltī battī bujhā.ī thī

udasi ki jhilmil jhil ke par

main ne dekha

tumhaari lal chuDiyan sabz hansi hans rahi thin

os ki ek qurmuzi bund

tumhaari peshani par damak rahi thi

KHush-KHwabi ke naKHunon se tum

andeshon ki girhen khol rahi thin

chand ki nami se

imkan ke be-kanar panne par

kuchh likh rahi thin tumhaari ungliyan

aur tumhaare panw ke niche

dharti ki jhanjhan baj rahi thi

aur ye mera wahm nahin

ki prithwi par kahin jab chand

ek bachche ke sath dauD raha tha

tum hawa se apna hath chhuDa kar

ek saji hui chaukhaT mein daKHil

ho gai thin

aur ye mera KHwab nahin

ki suraj jab

aadhe aasman mein chamak raha tha

apni chuDiyan apni bundi

apne andeshe apni ungliyan

apne hath aur apne honT

sab utar kar

tum ne

aankh se aankh jalai thi

jalti batti bujhai thi