ye meri ghazlen ye meri nazmen

ye merī ġhazleñ ye merī nazmeñ

tamām terī hikāyateñ haiñ

ye tazkire tere lutf ke haiñ

ye sher terī shikāyateñ haiñ

maiñ sab tirī nazr kar rahā huuñ

ye un zamānoñ kī sā.ateñ haiñ

jo zindagī ke na.e safar meñ

tujhe kisī vaqt yaad aa.eñ

to ek ik harf jī uThegā

pahan ke anfās kī qabā.eñ

udaas tanhā.iyoñ ke lamhoñ

meñ naach uTTheñgī ye apsarā.eñ

mujhe tire dard ke alāva bhī

aur dukh the ye māntā huuñ

hazār ġham the jo zindagī kī

talāsh meñ the ye jāntā huuñ

mujhe ḳhabar thī ki tere āñchal meñ

dard kī ret chhāntā huuñ

magar har ik baar tujh ko chhū kar

ye ret rañg-e-hinā banī hai

ye zaḳhm gulzār ban ga.e haiñ

ye āh-e-sozāñ ghaTā banī hai

ye dard mauj-e-sabā huā hai

ye aag dil kī sadā banī hai

aur ab ye saarī matā-e-hastī

ye phuul ye zaḳhm sab tire haiñ

ye dukh ke nauhe ye sukh ke naġhme

jo kal mire the vo ab tire haiñ

jo terī qurbat tirī judā.ī

meñ kaT ga.e roz-o-shab tire haiñ

vo terā shā.ir tirā muġhannī

vo jis kī bāteñ ajiib sī thiiñ

vo jis ke andāz ḳhusravāna the

aur adā.eñ ġharīb sī thiiñ

vo jis ke jiine kī ḳhvāhisheñ bhī

ḳhud us ke apne nasīb sī thiiñ

na pūchh is kā ki vo divāna

bahut dinoñ kā ujaḌ chukā hai

vo kohkan to nahīñ thā lekin

kaḌī chaTānoñ se laḌ chukā hai

vo thak chukā thā aur us kā tesha

usī ke siine meñ gaḌ chukā hai

ye meri ghazlen ye meri nazmen

tamam teri hikayaten hain

ye tazkire tere lutf ke hain

ye sher teri shikayaten hain

main sab teri nazr kar raha hun

ye un zamanon ki saaten hain

jo zindagi ke nae safar mein

tujhe kisi waqt yaad aaen

to ek ek harf ji uThega

pahan ke anfas ki qabaen

udas tanhaiyon ke lamhon

mein nach uTThengi ye apsaraen

mujhe tere dard ke alawa bhi

aur dukh the ye manta hun

hazar gham the jo zindagi ki

talash mein the ye jaanta hun

mujhe KHabar thi ki tere aanchal mein

dard ki ret chhanta hun

magar har ek bar tujh ko chhu kar

ye ret rang-e-hina bani hai

ye zaKHm gulzar ban gae hain

ye aah-e-sozan ghaTa bani hai

ye dard mauj-e-saba hua hai

ye aag dil ki sada bani hai

aur ab ye sari mata-e-hasti

ye phul ye zaKHm sab tere hain

ye dukh ke nauhe ye sukh ke naghme

jo kal mere the wo ab tere hain

jo teri qurbat teri judai

mein kaT gae roz-o-shab tere hain

wo tera shair tera mughanni

wo jis ki baaten ajib si thin

wo jis ke andaz KHusrawana the

aur adaen gharib si thin

wo jis ke jine ki KHwahishen bhi

KHud us ke apne nasib si thin

na puchh is ka ki wo diwana

bahut dinon ka ujaD chuka hai

wo kohkan to nahin tha lekin

kaDi chaTanon se laD chuka hai

wo thak chuka tha aur us ka tesha

usi ke sine mein gaD chuka hai