ye raat hogi tawil kitni

ye raat hogī tavīl kitnī

buland hogī fasīl kitnī

ye ḳhauf-o-dahshat kā daur-daura

rahegā kab tak

galī galī kūcha kūcha pahra

rahegā kab tak

ye aag jañgal kī aag kab tak

falak se barsegī raakh kab tak

sitāre TūTeñge aur kab tak

yuuñ āsmāñ se

parind rūTheñge āshiyāñ se

ye phūl-patte havā.eñ shabnam

kareñge kis kis kā aur mātam

siyāh pur-haul āñdhiyoñ kā ye mauj mela

rahegā kab tak

muqāble meñ shajar akelā

kaḌaktī bechain bijliyoñ kā

zamīñ kī jānib safar kabhī to tamām hogā

phireñge dhartī ke din yaqīnan

kabhī to bandoñ pe lutf-e-rabb-e-anām hogā

hasīn titlī ke narm-o-nāzuk paroñ kī jumbish

dhanak ke ḳhush-dīda rañg har-sū

bikher degī

kabhī to bād-e-nasīm ḳhushbū bikher degī

mujhe yaqīñ hai ki kal ke sūraj kī muskurāhaT

zamīñ ke mahrūm bāsiyoñ ko

na.ī sahar kā payām degī

laboñ ko izn-e-kalām degī

mujhe yaqīñ hai vo din bhī aa.egā

jab urūs-e-chaman ke qadmoñ kī dhīmī aahaT sunā.ī degī

bahār lamhoñ kī gungunāhaT sunā.ī degī

tuyūr chahkeñge bāliyoñ par

gulāb mahkeñge Dāliyoñ par

kabhī to dekhegā sar uThā kar

chaman meñ nanhā sā koī paudā

kabhī to jhāñkegā bādaloñ kā haTā ke ghuñghaT

kahīñ ye chhoTā sā ik sitārā

kabhī to niklegā chāñd puurā

ye ghar ye āñgan chamak uThegā

har ek chehra damak uThegā

mujhe yaqīñ hai

kabhī to utregā āsmāñ se koī farishta

paḌhegā chehre pe jo likhā hai

sunegā vo bhī jo ham ne ab tak nahīñ kahā hai

siyāh rātoñ kī tīrgī kā

tavīl be-kaif zindagī kā

koī to aa kar hisāb degā

hamārī āñkhoñ meñ ḳhaar ban kar

jo chubh rahe haiñ savāl un kā

javāb degā

ye raat hogi tawil kitni

buland hogi fasil kitni

ye KHauf-o-dahshat ka daur-daura

rahega kab tak

gali gali kucha kucha pahra

rahega kab tak

ye aag jangal ki aag kab tak

falak se barsegi rakh kab tak

sitare TuTenge aur kab tak

yun aasman se

parind ruThenge aashiyan se

ye phul-patte hawaen shabnam

karenge kis kis ka aur matam

siyah pur-haul aandhiyon ka ye mauj mela

rahega kab tak

muqable mein shajar akela

kaDakti bechain bijliyon ka

zamin ki jaanib safar kabhi to tamam hoga

phirenge dharti ke din yaqinan

kabhi to bandon pe lutf-e-rabb-e-anam hoga

hasin titli ke narm-o-nazuk paron ki jumbish

dhanak ke KHush-dida rang har-su

bikher degi

kabhi to baad-e-nasim KHushbu bikher degi

mujhe yaqin hai ki kal ke suraj ki muskurahaT

zamin ke mahrum basiyon ko

nai sahar ka payam degi

labon ko izn-e-kalam degi

mujhe yaqin hai wo din bhi aaega

jab urus-e-chaman ke qadmon ki dhimi aahaT sunai degi

bahaar lamhon ki gungunahaT sunai degi

tuyur chahkenge baaliyon par

gulab mahkenge Daliyon par

kabhi to dekhega sar uTha kar

chaman mein nanha sa koi pauda

kabhi to jhankega baadalon ka haTa ke ghunghaT

kahin ye chhoTa sa ek sitara

kabhi to niklega chand pura

ye ghar ye aangan chamak uThega

har ek chehra damak uThega

mujhe yaqin hai

kabhi to utrega aasman se koi farishta

paDhega chehre pe jo likha hai

sunega wo bhi jo hum ne ab tak nahin kaha hai

siyah raaton ki tirgi ka

tawil be-kaif zindagi ka

koi to aa kar hisab dega

hamari aankhon mein KHar ban kar

jo chubh rahe hain sawal un ka

jawab dega