یہ رات ہوگی طویل کتنی

یہ رات ہوگی طویل کتنی

بلند ہوگی فصیل کتنی

یہ خوف و دہشت کا دور دورہ

رہے گا کب تک

گلی گلی کوچہ کوچہ پہرہ

رہے گا کب تک

یہ آگ جنگل کی آگ کب تک

فلک سے برسے گی راکھ کب تک

ستارے ٹوٹیں گے اور کب تک

یوں آسماں سے

پرند روٹھیں گے آشیاں سے

یہ پھول پتے ہوائیں شبنم

کریں گے کس کس کا اور ماتم

سیاہ پر ہول آندھیوں کا یہ موج میلہ

رہے گا کب تک

مقابلے میں شجر اکیلا

کڑکتی بے چین بجلیوں کا

زمیں کی جانب سفر کبھی تو تمام ہوگا

پھریں گے دھرتی کے دن یقیناً

کبھی تو بندوں پہ لطف رب انام ہوگا

حسین تتلی کے نرم و نازک پروں کی جنبش

دھنک کے خوش دیدہ رنگ ہر سو

بکھیر دے گی

کبھی تو باد نسیم خوشبو بکھیر دے گی

مجھے یقیں ہے کہ کل کے سورج کی مسکراہٹ

زمیں کے محروم باسیوں کو

نئی سحر کا پیام دے گی

لبوں کو اذن کلام دے گی

مجھے یقیں ہے وہ دن بھی آئے گا

جب عروس چمن کے قدموں کی دھیمی آہٹ سنائی دے گی

بہار لمحوں کی گنگناہٹ سنائی دے گی

طیور چہکیں گے بالیوں پر

گلاب مہکیں گے ڈالیوں پر

کبھی تو دیکھے گا سر اٹھا کر

چمن میں ننھا سا کوئی پودا

کبھی تو جھانکے گا بادلوں کا ہٹا کے گھونگھٹ

کہیں یہ چھوٹا سا اک ستارا

کبھی تو نکلے گا چاند پورا

یہ گھر یہ آنگن چمک اٹھے گا

ہر ایک چہرہ دمک اٹھے گا

مجھے یقیں ہے

کبھی تو اترے گا آسماں سے کوئی فرشتہ

پڑھے گا چہرے پہ جو لکھا ہے

سنے گا وہ بھی جو ہم نے اب تک نہیں کہا ہے

سیاہ راتوں کی تیرگی کا

طویل بے کیف زندگی کا

کوئی تو آ کر حساب دے گا

ہماری آنکھوں میں خار بن کر

جو چبھ رہے ہیں سوال ان کا

جواب دے گا