یہ سال اچھا ہے

برف اور بارود کے برادے میں

ٹھٹھرتی سلگتی شب

تمہارے آنے کی خوشبو

چہار سمتوں میں

ہر ایک امید کا آنگن

صدائیں دیتا ہے

خمیدہ خواب ہمارے بھی سر اٹھا کے چلیں

نگاہیں ناز کریں

حروف لب سے جو نکلیں تو دیں پیام مسیح

ہماری سمتوں کو امن و اماں میسر ہو

چمکتے چاند کا تیشہ فصیل شب کاٹے

تو جوئے شیر آئے

اسی لیے مرے چاروں طرف چراغاں ہے

کہ تم جو آؤ دبے پاؤں تو کچل ڈالو

یہ مصلحت کے مہکتے ہزارہا موسم

سڑک پہ کھیلتے بچوں کو تھوڑا بہلاؤ

دھوپ دکھلاؤ سرد راتوں کو

گرم بارود کو بھی پگھلاؤ

پیام مرگ کے بدلے ملے پیام حیات

مجھے بھی ایک برہمن نے کہا ہے کہ یہ سال اچھا ہے