ye shahr-e-dilli hai

bahut na Thokareñ khaao ye shahr-e-dillī hai

qadam sañbhal ke uThāo ye shahr-e-dillī hai

yahāñ kī ḳhaak ibārat hai 'mīr'-o-'ġhālib' se

yahāñ na ḳhaak uḌaao ye shahr-e-dillī hai

ye bādshāhoñ kā maskan nagar hai valiyoñ kā

yahāñ to hosh meñ aao ye shahr-e-dillī hai

kahīñ javāb nahīñ jis kā nāznīñ hai ye vo

tum is ke naaz uThāo ye shahr-e-dillī hai

na hogā is ke dar-o-bām par zarā bhī asar

hazār shor machāo ye shahr-e-dillī hai

ġharaz baġhair yahāñ dostī kī rasm nahīñ

samajh ke dost banāo ye shahr-e-dillī hai

bahut hai koī shanāsā jo raah meñ mil jaa.e

kisī ke ghar bhī na jaao ye shahr-e-dillī hai

kise ḳhabar hai ki kab kis se pher le nazreñ

yahāñ na pyaar baḌhāo ye shahr-e-dillī hai

har ik chamaktī huī shai guhar nahīñ hotī

fareb aur na khaao ye shahr-e-dillī hai

kahāñ chalī ho kise de rahī ho yuuñ āvāz

ġharīb dil kī sadāo ye shahr-e-dillī hai

hayāt itnī pareshān kyoñ huī 'iqbāl'

savāl hī na uThāo ye shahr-e-dillī hai

bahut na Thokaren khao ye shahr-e-dilli hai

qadam sanbhal ke uThao ye shahr-e-dilli hai

yahan ki KHak ibarat hai 'mir'-o-'ghaalib' se

yahan na KHak uDao ye shahr-e-dilli hai

ye baadshahon ka maskan nagar hai waliyon ka

yahan to hosh mein aao ye shahr-e-dilli hai

kahin jawab nahin jis ka naznin hai ye wo

tum is ke naz uThao ye shahr-e-dilli hai

na hoga is ke dar-o-baam par zara bhi asar

hazar shor machao ye shahr-e-dilli hai

gharaz baghair yahan dosti ki rasm nahin

samajh ke dost banao ye shahr-e-dilli hai

bahut hai koi shanasa jo rah mein mil jae

kisi ke ghar bhi na jao ye shahr-e-dilli hai

kise KHabar hai ki kab kis se pher le nazren

yahan na pyar baDhao ye shahr-e-dilli hai

har ek chamakti hui shai guhar nahin hoti

fareb aur na khao ye shahr-e-dilli hai

kahan chali ho kise de rahi ho yun aawaz

gharib dil ki sadao ye shahr-e-dilli hai

hayat itni pareshan kyon hui 'iqbaal'

sawal hi na uThao ye shahr-e-dilli hai