ye yaqin ye guman

kanār-e-āb sar-e-shām aa ke baiThā huuñ

nazar meñ sabr se begāna ik samundar hai

ubhartā dabtā machaltā biphar ke baḌhtā huā

kabhī utartā huā aur utar ke chaḌhtā huā

tamāsha sa.ī-e-junūñ-ḳhez kā dikhātā huā

tilism-e-fikr se apnī taraf bulātā huā

kanār-e-āb sar-e-shām aa ke baiThā huuñ

nazar meñ ek hujūm-e-jigar-figār liye

dil-o-dimāġh meñ sau uljhanoñ kā baar liye

nafas nafas meñ ġham-e-zīst ke sharār liye

ḳhayāl-o-fikr-o-tajassus kā ḳhalfashār liye

yaqīñ kā josh liye vahm-e-sho.ala-bār liye

kanār-e-āb sar-e-shām aa ke baiThā huuñ

nazar meñ ek ajab dil-fareb manzar hai

vahāñ pe duur zarā duur kuchh zarā aage

ufuq se haath milātā huā samundar hai

vahāñ pe hai koī kamtar na koī behtar hai

madār-e-zīst vahāñ to barābarī par hai

vahāñ na hai koī zulmat na koī māyūsī

har ek zarra vahāñ raushan-o-munavvar hai

pahuñch gayā hai jo us anjuman meñ ḳhush-tar hai

maiñ sochtā huuñ ki ek jast meñ pahuñch jā.ūñ

us ek jast meñ jo fāsloñ kī dushman hai

vahāñ hayāt jahāñ qahr hai na uljhan hai

magar Thahar zarā ai dil ye soch luuñ pahle

pahuñch gayā jo maiñ us sarhad-e-nigāh talak

vahāñ pahuñch ke agar aah aisā ho jaa.e

nazar ke sāmne jo kuchh thā mahz dhokā thā

vo ik hasīn tasavvur thā jo ki dekhā thā

vo had jahāñ ki samundar ufuq ko chhūtā thā

kuchh aur baḌh ga.ī aage jo sarhad-e-imkāñ

madār-e-zīst bhalā phir banā.eñge kis ko

ḳhirad kī manzil-e-āḳhir banā.eñge kis ko

ḳhirad kī manzil-e-āḳhir na mil sakegī kabhī

magar ye ziist to phir bhī guzārnī hogī

lagā duuñ jast ki ye sarhad-e-nigāh bahut

hasīn lagtī hai kal kyā ho ye kise mālūm

kanār-e-āb sar-e-shām aa ke baiThā huuñ

yaqīñ kā josh liye azm kā ḳhumār liye

junūn-e-shauq liye fikr-e-hoshiyār liye

kanar-e-ab sar-e-sham aa ke baiTha hun

nazar mein sabr se begana ek samundar hai

ubharta dabta machalta biphar ke baDhta hua

kabhi utarta hua aur utar ke chaDhta hua

tamasha sai-e-junun-KHez ka dikhata hua

tilism-e-fikr se apni taraf bulata hua

kanar-e-ab sar-e-sham aa ke baiTha hun

nazar mein ek hujum-e-jigar-figar liye

dil-o-dimagh mein sau uljhanon ka bar liye

nafas nafas mein gham-e-zist ke sharar liye

KHayal-o-fikr-o-tajassus ka KHalfashaar liye

yaqin ka josh liye wahm-e-shoala-bar liye

kanar-e-ab sar-e-sham aa ke baiTha hun

nazar mein ek ajab dil-fareb manzar hai

wahan pe dur zara dur kuchh zara aage

ufuq se hath milata hua samundar hai

wahan pe hai koi kamtar na koi behtar hai

madar-e-zist wahan to barabari par hai

wahan na hai koi zulmat na koi mayusi

har ek zarra wahan raushan-o-munawwar hai

pahunch gaya hai jo us anjuman mein KHush-tar hai

main sochta hun ki ek jast mein pahunch jaun

us ek jast mein jo faslon ki dushman hai

wahan hayat jahan qahr hai na uljhan hai

magar Thahar zara ai dil ye soch lun pahle

pahunch gaya jo main us sarhad-e-nigah talak

wahan pahunch ke agar aah aisa ho jae

nazar ke samne jo kuchh tha mahz dhoka tha

wo ek hasin tasawwur tha jo ki dekha tha

wo had jahan ki samundar ufuq ko chhuta tha

kuchh aur baDh gai aage jo sarhad-e-imkan

madar-e-zist bhala phir banaenge kis ko

KHirad ki manzil-e-aKHir banaenge kis ko

KHirad ki manzil-e-aKHir na mil sakegi kabhi

magar ye zist to phir bhi guzarni hogi

laga dun jast ki ye sarhad-e-nigah bahut

hasin lagti hai kal kya ho ye kise malum

kanar-e-ab sar-e-sham aa ke baiTha hun

yaqin ka josh liye azm ka KHumar liye

junun-e-shauq liye fikr-e-hoshiyar liye