Zad-e-safar

ye zindagī kā safar ajab hai

ki is meñ jo bhī milā

vo mil kar bichhaḌ gayā hai

chalā thā jab kārvāñ hamārā

na.e ufuq kī taraf

to ham bhī

javāñ umañgoñ ke pāsbāñ the

qadam qadam par

jab ek ik kar ke

sab hamāre rafīq chhūTe

to jin na.ī manziloñ kī jānib

chale the kal ham

vo sab ufuq kī tarah gurezāñ

ḳhalā meñ tahlīl ho ga.ī thiiñ

maiñ is masāfat se thak gayā huuñ

magar mujhe koī ġham nahīñ hai

maiñ apne baad aane vaalī nasloñ ke haq meñ

ab ye duā karūñgā

vo manzileñ jin ke vāste maiñ ne zindagī kā

aziiz sarmāya taj diyā hai

vo manzileñ un kī gard-e-pā hoñ

vahāñ se jab vo

guzar ke aage kī manziloñ kī taraf baḌheñ

merī saarī ḳhushiyoñ ko apnā zād-e-safar samajh kar

vo saath rakh leñ

ye zindagi ka safar ajab hai

ki is mein jo bhi mila

wo mil kar bichhaD gaya hai

chala tha jab karwan hamara

nae ufuq ki taraf

to hum bhi

jawan umangon ke pasban the

qadam qadam par

jab ek ek kar ke

sab hamare rafiq chhuTe

to jin nai manzilon ki jaanib

chale the kal hum

wo sab ufuq ki tarah gurezan

KHala mein tahlil ho gai thin

main is masafat se thak gaya hun

magar mujhe koi gham nahin hai

main apne baad aane wali naslon ke haq mein

ab ye dua karunga

wo manzilen jin ke waste main ne zindagi ka

aziz sarmaya taj diya hai

wo manzilen un ki gard-e-pa hon

wahan se jab wo

guzar ke aage ki manzilon ki taraf baDhen

meri sari KHushiyon ko apna zad-e-safar samajh kar

wo sath rakh len