zawiye

mujhe to be-sukūñ sā kar gayā us shoḳh kā kahnā

haqīqat ke tarāzū meñ kabhī taulā hai jazboñ ko

mohabbat ke taqaddus kā bharam rakkhā kabhī tū ne

kabhī be-sāḳhta lipTā hai mahrūm-e-sabāhat se

kabhī hāl-e-kajī pūchhā hai mas.hūr-e-qabāhat se

kabhī dasht-e-junūñ paaTā hai jazbāt-e-irādat se

kabhī sarsar se talḳhī kā sabab pūchhā matānat se

kabhī tarjīh dī ḳhāk-e-chaman par reg-e-sahrā ko

gul-o-bulbul se haT kar bhī kabhī dekhā hai fitrat ko

gul-o-bulbul bajā lekin chaman meñ ḳhaar bhī to hai

sabāhat vaqf-e-gulshan hī nahīñ kohsār bhī to haiñ

ka.ī poshīda az fikr-o-nazar shahkār bhī to haiñ

ġhalat haiñ nāsiya-farsā.iyāñ terī talab terī

tirī rāheñ judā haiñ ahl-e-dil se ahl-e-hasrat se

tirā husn-e-nazar mahdūd hai zaatī maqāsid tak

tirī ye shapra-chashmī hī tujhe barbād kar degī

mujhe to be-sukun sa kar gaya us shoKH ka kahna

haqiqat ke taraazu mein kabhi taula hai jazbon ko

mohabbat ke taqaddus ka bharam rakkha kabhi tu ne

kabhi be-saKHta lipTa hai mahrum-e-sabahat se

kabhi haal-e-kaji puchha hai mashur-e-qabahat se

kabhi dasht-e-junun paTa hai jazbaat-e-iradat se

kabhi sarsar se talKHi ka sabab puchha matanat se

kabhi tarjih di KHak-e-chaman par reg-e-sahra ko

gul-o-bulbul se haT kar bhi kabhi dekha hai fitrat ko

gul-o-bulbul baja lekin chaman mein KHar bhi to hai

sabahat waqf-e-gulshan hi nahin kohsar bhi to hain

kai poshida az fikr-o-nazar shahkar bhi to hain

ghalat hain nasiya-farsaiyan teri talab teri

teri rahen juda hain ahl-e-dil se ahl-e-hasrat se

tera husn-e-nazar mahdud hai zati maqasid tak

teri ye shapra-chashmi hi tujhe barbaad kar degi