zaban-e-urdu

jahāñ pahoñche hindostānī vahāñ pahuñchī zabāñ urdu

murkkab har zabāñ se ban ga.ī shīrīñ zabāñ urdu

nikal kar hind se pahuñchī ye america aur africa

samajh lete haiñ har mulkoñ ke bāshinde zabāñ urdu

ga.ī ye chīn-o-jāpān aur ga.ī europe ke mulkoñ meñ

rahā jo chand din hind meñ huī us kī zabāñ urdu

samundar paar ho kar ye ga.ī sahrā-nashīnoñ meñ

hamārī hai bahut āsān aur shīrīñ zabāñ urdu

na pūchho us kī vus.at ko kahāñ se hai kahāñ pahuñchī

taraqqī ḳhud-baḳhud ye karne vaalī hai zabāñ urdu

palī hai pyār-o-ulfat meñ ye hindū aur musalmāñ ke

to phir kyuuñ ḳhaar ho nazroñ meñ ye pyārī zabāñ urdu

miTānā chāhiye us ko na nafrat aur ġhaflat se

nishānī ulfat-o-millat kī hai be-shak zabāñ urdu

jahan pahonche hindostani wahan pahunchi zaban urdu

murkkab har zaban se ban gai shirin zaban urdu

nikal kar hind se pahunchi ye america aur africa

samajh lete hain har mulkon ke bashinde zaban urdu

gai ye chin-o-japan aur gai europe ke mulkon mein

raha jo chand din hind mein hui us ki zaban urdu

samundar par ho kar ye gai sahra-nashinon mein

hamari hai bahut aasan aur shirin zaban urdu

na puchho us ki wusat ko kahan se hai kahan pahunchi

taraqqi KHud-baKHud ye karne wali hai zaban urdu

pali hai pyar-o-ulfat mein ye hindu aur musalman ke

to phir kyun KHar ho nazron mein ye pyari zaban urdu

miTana chahiye us ko na nafrat aur ghaflat se

nishani ulfat-o-millat ki hai be-shak zaban urdu