zaban se nafrat kyun

jahāñ bhī chhānūñ ghanī ho qayām karte chalo

adab jahāñ bhī mile ehtirām karte chalo

har ik zabān ko yaaro salām karte chalo

giroh kī hai na firqe kī aur na maz.hab kī

zabāñ virāsat-e-insāniyat hai ham sab kī

zabāñ ke baab meñ man aur tū kī had kaisī

koī zabān ho insāñ ko us se kad kaisī

zabān paak hai gaañv kī goriyoñ kī tarah

zabāñ aziim hai maaoñ kī loriyoñ kī tarah

zabāñ tasalsul-e-tārīḳh-e-zindagānī hai

zabān manāzil-e-tahzīb kī kahānī hai

zabān bahte hue vaqt kī ravānī hai

nazar meñ ho jo bulandī bhī aur vus.at bhī

to har zabān meñ ik husn bhī hai azmat bhī

vo raat kā hai pujārī sahar kā dushman hai

jo hai zabān kā dushman bashar kā dushman hai

zamīñ kā husn hai khetoñ kī tāzgī hai zabāñ

rahaT kī lai hai to panghaT kī rāgnī hai zabāñ

galī kā shor gharoñ kī hamāhamī hai zabāñ

junūn-e-zīst kī aahaT hai gungunāhaT hai

zabāñ hayāt ke hoñToñ kī muskurāhaT hai

fareb-o-maslahat-o-makr-o-rasmiyāt nahīñ

riyā kā zikr bayān-e-takallufāt nahīñ

zabān ahl-e-siyāsat ke bas kī baat nahīñ

zabāñ machaltī hai miTTī pe chahchahoñ kī tarah

zabāñ nikaltī hai chilman se zamzamoñ kī tarah

zabān ubaltī hai āñgan ke qahqahoñ kī tarah

zabān bantī hai chaupāl meñ javāñ kī tarah

zabān bantī hai baiThak meñ dāstāñ kī tarah

zabān Dhaltī hai bāzār meñ dukānoñ meñ

zabān chaltī hai kūchoñ meñ kār-ḳhānoñ meñ

zabāñ qadam-ba-qadam sīḌhiyoñ pe chaḌhtī hai

zabān pyaar mohabbat se aage baḌhtī hai

na daftaroñ na kahīñ filoñ meñ Dhaltī hai

zabān dhartī ke siine se lag ke chaltī hai

zabāñ laboñ kā salīqa diloñ kā nuur bhī hai

zabān qaum kī izzat bhī hai ġhurūr bhī hai

zabāñ avaam kī mehnat bhī hai shu.ūr bhī hai

kisī shu.ūr se āḳhir hameñ adāvat kyuuñ

koī zabān ho insāñ ko us se nafrat kyuuñ

zabān paak hai gaañv kī goriyoñ kī tarah

zabāñ aziim hai maaoñ kī loriyoñ kī tarah

jahan bhi chhanun ghani ho qayam karte chalo

adab jahan bhi mile ehtiram karte chalo

har ek zaban ko yaro salam karte chalo

giroh ki hai na firqe ki aur na mazhab ki

zaban wirasat-e-insaniyat hai hum sab ki

zaban ke bab mein man aur tu ki had kaisi

koi zaban ho insan ko us se kad kaisi

zaban pak hai ganw ki goriyon ki tarah

zaban azim hai maon ki loriyon ki tarah

zaban tasalsul-e-tariKH-e-zindagani hai

zaban manazil-e-tahzib ki kahani hai

zaban bahte hue waqt ki rawani hai

nazar mein ho jo bulandi bhi aur wusat bhi

to har zaban mein ek husn bhi hai azmat bhi

wo raat ka hai pujari sahar ka dushman hai

jo hai zaban ka dushman bashar ka dushman hai

zamin ka husn hai kheton ki tazgi hai zaban

rahaT ki lai hai to panghaT ki ragni hai zaban

gali ka shor gharon ki hamahami hai zaban

junun-e-zist ki aahaT hai gungunahaT hai

zaban hayat ke honTon ki muskurahaT hai

fareb-o-maslahat-o-makr-o-rasmiyat nahin

riya ka zikr bayan-e-takallufat nahin

zaban ahl-e-siyasat ke bas ki baat nahin

zaban machalti hai miTTi pe chahchahon ki tarah

zaban nikalti hai chilman se zamzamon ki tarah

zaban ubalti hai aangan ke qahqahon ki tarah

zaban banti hai chaupal mein jawan ki tarah

zaban banti hai baiThak mein dastan ki tarah

zaban Dhalti hai bazar mein dukanon mein

zaban chalti hai kuchon mein kar-KHanon mein

zaban qadam-ba-qadam siDhiyon pe chaDhti hai

zaban pyar mohabbat se aage baDhti hai

na daftaron na kahin filon mein Dhalti hai

zaban dharti ke sine se lag ke chalti hai

zaban labon ka saliqa dilon ka nur bhi hai

zaban qaum ki izzat bhi hai ghurur bhi hai

zaban awam ki mehnat bhi hai shuur bhi hai

kisi shuur se aaKHir hamein adawat kyun

koi zaban ho insan ko us se nafrat kyun

zaban pak hai ganw ki goriyon ki tarah

zaban azim hai maon ki loriyon ki tarah