zahr

kueñ kī chiknī surḳh muñDer se

rassī khīñchte khīñchte us ke baazū shal ho jaate the

mard ke paañv dhone ko paanī phir bhī nā-kāfī thā

Daliyā bunte bunte us ke haath lahū se bhar jaate the

phir bhī roTī puure peT na miltī thī

chhappar līpte līpte us par Dheroñ mausam biit ga.e

lekin chhāñv nahīñ dekhī

oḌhnī siite siite us kī poreñ bhī pak jaatī thiiñ

magar kapās kī fasl se us ne hissa kabhī nahīñ paayā

ab ke fasl uThne ke baa'd

na.ī dhuup meñ baiThī vo ye soch rahī hai

pakte pakte poroñ kā ye zahr kisī din

sar tak bhī aa jā.egā

kuen ki chikni surKH munDer se

rassi khinchte khinchte us ke bazu shal ho jate the

mard ke panw dhone ko pani phir bhi na-kafi tha

Daliya bunte bunte us ke hath lahu se bhar jate the

phir bhi roTi pure peT na milti thi

chhappar lipte lipte us par Dheron mausam bit gae

lekin chhanw nahin dekhi

oDhni site site us ki poren bhi pak jati thin

magar kapas ki fasl se us ne hissa kabhi nahin paya

ab ke fasl uThne ke ba'd

nai dhup mein baiThi wo ye soch rahi hai

pakte pakte poron ka ye zahr kisi din

sar tak bhi aa jaega