زہر

کنویں کی چکنی سرخ منڈیر سے

رسی کھینچتے کھینچتے اس کے بازو شل ہو جاتے تھے

مرد کے پاؤں دھونے کو پانی پھر بھی نا کافی تھا

ڈلیا بنتے بنتے اس کے ہاتھ لہو سے بھر جاتے تھے

پھر بھی روٹی پورے پیٹ نہ ملتی تھی

چھپر لیپتے لیپتے اس پر ڈھیروں موسم بیت گئے

لیکن چھاؤں نہیں دیکھی

اوڑھنی سیتے سیتے اس کی پوریں بھی پک جاتی تھیں

مگر کپاس کی فصل سے اس نے حصہ کبھی نہیں پایا

اب کے فصل اٹھنے کے بعد

نئی دھوپ میں بیٹھی وہ یہ سوچ رہی ہے

پکتے پکتے پوروں کا یہ زہر کسی دن

سر تک بھی آ جائے گا