zaifa

ik za.īfa rāste meñ so rahī hai ḳhaak par

murdanī chhā.ī huī hai chehra-e-ġhamnāk par

aur kis mausam meñ jab tā.ūn hai phailā huā

zarra zarra hai vabā ke ḳhauf se simTā huā

raat aadhī aa chukī hai bām-o-dar ḳhāmosh haiñ

ahl-e-daulat laila-e-ishrat se ham-āġhosh haiñ

is qayāmat kī hai taarī zulmat-e-haul-āfrīñ

shab ke dil meñ sub.h kā goyā tasavvur tak nahīñ

pīchhe pīchhe aa rahā hai kaun ye kyā baat hai

baj rahe haiñ kaan uff kaisī bhayānak raat hai

halqa-e-zulmat meñ hai rāhoñ kī sahmī raushnī

yā chamaktī haiñ ghanī jhāḌī se āñkheñ sher kī

larza-bar-andām hai sehn-e-zamīñ kā arz-o-tūl

ho rahā hai ḳhaak par nāpāk rūhoñ kā nuzūl

aa rahī haiñ āsmāñ se ye sadā.eñ dam-ba-dam

dekh asbāb-e-halākat par na paḌ jaa.e qadam

bām-o-dar par maut kā parcham hai lahrāyā huā

aa rahī hai har qadam par bū-e-anfās-e-vabā

rauñgTe saare khaḌe haiñ saañs lenā hai vabāl

al-amāñ shor-e-sagān-e-rāh o ġhoġhā-e-shaġhāl

uf laraztī ḳhaufnāk āvāz chaukīdār kī

nabz chhūTī jā rahī hai gumbad-e-davvār kī

chupke chupke saañs lene se ghuTā jaatā hai dam

rakh rahā huuñ bolte zarroñ pe ruk ruk kar qadam

ibrat o dahshat kā ḳhanjar hai dil-e-ġhamnāk par

haa.e ye be-dam paḌā hai kaun ThanDī ḳhaak par

aah ai be-kas za.īfa ġham kī taḌpā.ī huī

ai zamāne kī jhinjhoḌī zar kī Thukrā.ī huī

mere dil ke aa.ine ko kar rahā hai chuur chuur

tere sar par rahguzar kī sham.a kā halkā sā nuur

ye tire sar kī safedī aur ye gard-e-malāl

meñ to kyā sharmā rahā hai ḳhud ḳhuda-e-zul-jalāl

bhuuk ke lashkar kā hai ruḳh par tire gard-o-ġhubār

ahd-e-razzāqī ke māthe par araq hai āshkār

tere bachche tere gardūñ ke sitāre kyā hue

ai za.īfa terī piirī ke sahāre kyā hue

aah ai dukhiyā ye kaisī pā.emālī ho ga.ī

Thokareñ khāne ko terī god ḳhālī ho ga.ī

so rahā hai terā vāris kis taraf pahne kafan

dafn hai kis des meñ terā urūsī bāñkpan

bazm-e-ishrat meñ dulhan kis ne banāyā thā tujhe

byaah kar kaun apne ghar meñ aah laayā thā tujhe

ḳhuun ruḳh par dauḌtā hogā tirī āvāz se

tujh ko paalā hogā terī maañ ne kis kis naaz se

Dāltī hogī tujhe nahlā-dhulā kar sar meñ tel

baap kā dil khīñchtā hogā tirī guḌiyoñ kā khel

paas kī tāsīr kyuuñ chehre pe duunī ho ga.ī

mā.ikā vīrāñ huā sasurāl suunī ho ga.ī

chāhne vaale tire sab turbatoñ meñ so ga.e

kheltī thī jin ghane bāġhoñ meñ vo kyā ho ga.e

uf-rī māyūsī kisī kā aasrā rakhtī nahīñ

shubah hotā hai ki tū shāyad ḳhudā rakhtī nahīñ

tū kahāñ kī rahne vaalī hai tirā kyā naam hai

bol tū kis dil-nashīñ āġhāz kā anjām hai

hind meñ insāniyat kā daur hī baaqī nahīñ

dard ho kis tarah koī mard hī baaqī nahīñ

mard hī hote to karte bekasoñ kā ehtirām

mard hī hote to rah sakte the yuuñ ban kar ġhulām

ḳhidmat-e-aġhyār se fursat koī paatā nahīñ

sach hai apnoñ par ġhulāmoñ ko taras aatā nahīñ

ai za.īfa nañg hai tū mulk-o-millat ke liye

tū hai ik dhabbā jabīn-e-ahl-e-daulat ke liye

ik khulī zillat hai adyān-o-milal ke vāste

tauq hai la.anat kā tū ahl-e-duval ke vāste

to va.īd-e-qahr hai arbāb-e-ishrat ke liye

bars kā ik daaġh hai rū-e-hukūmat ke liye

mujh ko hairat hai ki tujh ko dekh kar zār-o-nizār

gaḌ nahīñ jaate hayā se hākimān-e-zī-vaqār

dekh kar terā Dhalā mankā nahīñ hotā hai chuur

gardanoñ ke ḳham ko saḳhtī baḳhshne vaalā ġhurūr

paḌ nahīñ jaate ilāhī sīna-e-daulat meñ daaġh

bujh nahīñ jaate shabistān-e-imārat ke charāġh

apnī tāb-e-zar se ai sarmāya-dāro! hoshiyār

apne tājoñ kī chamak se tāj-dāro hoshiyār

nīlam-o-yāqūt se shole bhaḌak uThne ko haiñ

surḳh dīnāroñ meñ añgāre dahak uThne ko haiñ

farsh-e-gul vaalo zamīñ par log mahv-e-ḳhvāb haiñ

ḳhirmanoñ ke pāsbānoñ bijliyāñ betāb haiñ!!

ek zaifa raste mein so rahi hai KHak par

murdani chhai hui hai chehra-e-ghamnak par

aur kis mausam mein jab taun hai phaila hua

zarra zarra hai waba ke KHauf se simTa hua

raat aadhi aa chuki hai baam-o-dar KHamosh hain

ahl-e-daulat laila-e-ishrat se ham-aghosh hain

is qayamat ki hai tari zulmat-e-haul-afrin

shab ke dil mein subh ka goya tasawwur tak nahin

pichhe pichhe aa raha hai kaun ye kya baat hai

baj rahe hain kan uff kaisi bhayanak raat hai

halqa-e-zulmat mein hai rahon ki sahmi raushni

ya chamakti hain ghani jhaDi se aankhen sher ki

larza-bar-andam hai sehn-e-zamin ka arz-o-tul

ho raha hai KHak par napak ruhon ka nuzul

aa rahi hain aasman se ye sadaen dam-ba-dam

dekh asbab-e-halakat par na paD jae qadam

baam-o-dar par maut ka parcham hai lahraya hua

aa rahi hai har qadam par bu-e-anfas-e-waba

raungTe sare khaDe hain sans lena hai wabaal

al-aman shor-e-sagan-e-rah o ghogha-e-shaghaal

uf larazti KHaufnak aawaz chaukidar ki

nabz chhuTi ja rahi hai gumbad-e-dawwar ki

chupke chupke sans lene se ghuTa jata hai dam

rakh raha hun bolte zarron pe ruk ruk kar qadam

ibrat o dahshat ka KHanjar hai dil-e-ghamnak par

hae ye be-dam paDa hai kaun ThanDi KHak par

aah ai be-kas zaifa gham ki taDpai hui

ai zamane ki jhinjhoDi zar ki Thukrai hui

mere dil ke aaine ko kar raha hai chur chur

tere sar par rahguzar ki shama ka halka sa nur

ye tere sar ki safedi aur ye gard-e-malal

mein to kya sharma raha hai KHud KHuda-e-zul-jalal

bhuk ke lashkar ka hai ruKH par tere gard-o-ghubar

ahd-e-razzaqi ke mathe par araq hai aashkar

tere bachche tere gardun ke sitare kya hue

ai zaifa teri piri ke sahaare kya hue

aah ai dukhiya ye kaisi paemali ho gai

Thokaren khane ko teri god KHali ho gai

so raha hai tera waris kis taraf pahne kafan

dafn hai kis des mein tera urusi bankpan

bazm-e-ishrat mein dulhan kis ne banaya tha tujhe

byah kar kaun apne ghar mein aah laya tha tujhe

KHun ruKH par dauDta hoga teri aawaz se

tujh ko pala hoga teri man ne kis kis naz se

Dalti hogi tujhe nahla-dhula kar sar mein tel

bap ka dil khinchta hoga teri guDiyon ka khel

pas ki tasir kyun chehre pe duni ho gai

maika viran hua sasural suni ho gai

chahne wale tere sab turbaton mein so gae

khelti thi jin ghane baghon mein wo kya ho gae

uf-ri mayusi kisi ka aasra rakhti nahin

shubah hota hai ki tu shayad KHuda rakhti nahin

tu kahan ki rahne wali hai tera kya nam hai

bol tu kis dil-nashin aaghaz ka anjam hai

hind mein insaniyat ka daur hi baqi nahin

dard ho kis tarah koi mard hi baqi nahin

mard hi hote to karte bekason ka ehtiram

mard hi hote to rah sakte the yun ban kar ghulam

KHidmat-e-aghyar se fursat koi pata nahin

sach hai apnon par ghulamon ko taras aata nahin

ai zaifa nang hai tu mulk-o-millat ke liye

tu hai ek dhabba jabin-e-ahl-e-daulat ke liye

ek khuli zillat hai adyan-o-milal ke waste

tauq hai lanat ka tu ahl-e-duwal ke waste

to waid-e-qahr hai arbab-e-ishrat ke liye

bars ka ek dagh hai ru-e-hukumat ke liye

mujh ko hairat hai ki tujh ko dekh kar zar-o-nizar

gaD nahin jate haya se hakiman-e-zi-waqar

dekh kar tera Dhala manka nahin hota hai chur

gardanon ke KHam ko saKHti baKHshne wala ghurur

paD nahin jate ilahi sina-e-daulat mein dagh

bujh nahin jate shabistan-e-imarat ke charagh

apni tab-e-zar se ai sarmaya-daro! hoshiyar

apne tajon ki chamak se taj-daro hoshiyar

nilam-o-yaqut se shole bhaDak uThne ko hain

surKH dinaron mein angare dahak uThne ko hain

farsh-e-gul walo zamin par log mahw-e-KHwab hain

KHirmanon ke pasbanon bijliyan betab hain!!