zaKHm-e-tamanna

ek phuul kā chaman meñ talabgār maiñ huā

vo phuul khil rahā thā sar-e-shāḳh aarzū

vo phuul sad-hazār gulistāñ meñ intiḳhāb

vo phuul dilkashī kī kahānī kā shoḳh baab

doshīzgī kā ḳhvāb bahāroñ kī āb-o-tāb

har pañkhuḌī nazākat-o-nuz.hat liye hue

vo gul thā itr-dān-e-mohabbat liye hue

jazbāt kī tapish se machalne lagā thā maiñ

garmī-e-ārzū se pighalne lagā thā meñ

resham kā jism rakhte hue ḳhaar ban gayā

vo phuul merī jaan kā āzār ban gayā

ik roz mere saath huā vāqi.a ajab

betāb ho ke dast-e-talab jab kiyā darāz

hāsil jo sāmne thā bahut dil-ḳharāsh thā

mānūs uñgliyāñ jo huiiñ nok-e-ḳhār se

ek ek qatra

un se Tapakne lagā lahū

vo Tiis thī ki

mujh ko

ḳhudā yaad aa gayā

ek phul ka chaman mein talabgar main hua

wo phul khil raha tha sar-e-shaKH aarzu

wo phul sad-hazar gulistan mein intiKHab

wo phul dilkashi ki kahani ka shoKH bab

doshizgi ka KHwab bahaaron ki aab-o-tab

har pankhuDi nazakat-o-nuzhat liye hue

wo gul tha itr-dan-e-mohabbat liye hue

jazbaat ki tapish se machalne laga tha main

garmi-e-arzu se pighalne laga tha mein

resham ka jism rakhte hue KHar ban gaya

wo phul meri jaan ka aazar ban gaya

ek roz mere sath hua waqia ajab

betab ho ke dast-e-talab jab kiya daraaz

hasil jo samne tha bahut dil-KHarash tha

manus ungliyan jo huin nok-e-KHar se

ek ek qatra

un se Tapakne laga lahu

wo Tis thi ki

mujh ko

KHuda yaad aa gaya