zalzala

jis se vābasta the ka.ī armān

sochtā huuñ miTā diyā kis ne

sochtā huuñ ki chand lamhoñ meñ

saarā gulshan jalā diyā kis ne

chand lamhoñ meñ ho ga.ī barbād

ko.enā kī hasīn ābādī

jaane merī sitam-zada āñkheñ us sisakte hue ḳharābe meñ

der se kyā talāsh kartī haiñ

muskurāhaT javān chehroñ kī

ābgīna hasīn ḳhvāboñ kā

chūḌiyāñ narm narm hāthoñ kī

chāñdnī surḳh surḳh māthoñ kī

us ḳharābe meñ kuchh nahīñ miltā

us tarah se zamīñ ne karvaT lī

ho ga.ī hai uthal-puthal dhartī

jal ga.e sab bahār ke sapne

sirf sapnoñ kī raakh baaqī hai

aaj mazdūr apnī kuTiyā meñ

ḳhaak ke bistare pe sotā hai

dekhtā hai mahal kī vīrānī

aur sarmāya-dār rotā hai

ye tabāhī ye ḳhāna-bardārī

haa.e kyā dil-gudāz manzar hai

jhoñpaḌī ho ki āsmān mahal

maut ke sāmne barābar hai

jis se wabasta the kai arman

sochta hun miTa diya kis ne

sochta hun ki chand lamhon mein

sara gulshan jala diya kis ne

chand lamhon mein ho gai barbaad

koena ki hasin aabaadi

jaane meri sitam-zada aankhen us sisakte hue KHarabe mein

der se kya talash karti hain

muskurahaT jawan chehron ki

aabgina hasin KHwabon ka

chuDiyan narm narm hathon ki

chandni surKH surKH mathon ki

us KHarabe mein kuchh nahin milta

us tarah se zamin ne karwaT li

ho gai hai uthal-puthal dharti

jal gae sab bahaar ke sapne

sirf sapnon ki rakh baqi hai

aaj mazdur apni kuTiya mein

KHak ke bistare pe sota hai

dekhta hai mahal ki virani

aur sarmaya-dar rota hai

ye tabahi ye KHana-bardari

hae kya dil-gudaz manzar hai

jhonpaDi ho ki aasman mahal

maut ke samne barabar hai