zamana

jalātā diye vaqt kī mahfiloñ meñ

jabīnoñ pe rultā samātā diloñ meñ

jagātā na.ī dhaḌkaneñ qāfiloñ meñ

zamāna guzartā chalā jā rahā hai

guzishta ko ḳhvāb-e-farāmosh kartā

har imroz ko shāmil-e-dosh kartā

fusūñ-zār-e-daurāñ ko gul-posh kartā

zamāna guzartā chalā jā rahā hai

baserā taġhayyur kī bāñhoñ meñ letā

talavvun kī amvāj par naav khetā

ik ik pal pe fardā ko āvāz detā

zamāna guzartā chalā jā rahā hai

qadam māh-o-ḳhāvar ke zīnoñ pe dhartā

havādis kī gahrā.iyoñ meñ utartā

mah-o-sāl kī naddiyāñ paar kartā

zamāna guzartā chalā jā rahā hai

ulajhtā haqā.eq ke mehr-o-ġhazab se

ubhartā bahār-o-ḳhizāñ ke aqab se

nikaltā huā halqa-e-roz-o-shab se

zamāna guzartā chalā jā rahā hai

rivāyāt ke zehn-o-paikar badaltā

jahāñ-dār qadroñ ke tevar badaltā

masā.il ke asnām-o-āzar badaltā

zamāna guzartā chalā jā rahā hai

batātā ki muḌtī hai tārīḳh kī rau

ye kahtā ki ūñchī huī sham.a kī lau

fazā tā ḳhalā Dāltā apnā partav

zamāna guzartā chalā jā rahā hai

sunātā kisī kohkan kā fasāna

banātā kisī sohnī ko nishāna

sañbhāle hue dard kā tāziyāna

zamāna guzartā chalā jā rahā hai

kisī saaz se kheltā raag jaise

bhaḌaktā is andāz se aag jaise

koī choT khāyā huā naag jaise

zamāna guzartā chalā jā rahā hai

churā.e nazar kaj-adāoñ kī sūrat

liye barq-e-pinhāñ ghaTāoñ kī sūrat

bagūle sameTe havāoñ kī sūrat

zamāna guzartā chalā jā rahā hai

jalata diye waqt ki mahfilon mein

jabinon pe rulta samata dilon mein

jagata nai dhaDkanen qafilon mein

zamana guzarta chala ja raha hai

guzishta ko KHwab-e-faramosh karta

har imroz ko shamil-e-dosh karta

fusun-zar-e-dauran ko gul-posh karta

zamana guzarta chala ja raha hai

basera taghayyur ki banhon mein leta

talawwun ki amwaj par naw kheta

ek ek pal pe farda ko aawaz deta

zamana guzarta chala ja raha hai

qadam mah-o-KHawar ke zinon pe dharta

hawadis ki gahraiyon mein utarta

mah-o-sal ki naddiyan par karta

zamana guzarta chala ja raha hai

ulajhta haqaeq ke mehr-o-ghazab se

ubharta bahaar-o-KHizan ke aqab se

nikalta hua halqa-e-roz-o-shab se

zamana guzarta chala ja raha hai

riwayat ke zehn-o-paikar badalta

jahan-dar qadron ke tewar badalta

masail ke asnam-o-azar badalta

zamana guzarta chala ja raha hai

batata ki muDti hai tariKH ki rau

ye kahta ki unchi hui shama ki lau

faza ta KHala Dalta apna partaw

zamana guzarta chala ja raha hai

sunata kisi kohkan ka fasana

banata kisi sohni ko nishana

sanbhaale hue dard ka taziyana

zamana guzarta chala ja raha hai

kisi saz se khelta rag jaise

bhaDakta is andaz se aag jaise

koi choT khaya hua nag jaise

zamana guzarta chala ja raha hai

churae nazar kaj-adaon ki surat

liye barq-e-pinhan ghaTaon ki surat

bagule sameTe hawaon ki surat

zamana guzarta chala ja raha hai