zamin-zadiyan

phuvār sī baras rahī ghaTā kī narmiyoñ tale

fusūñ-tarāzi-e-fazā ke sur meñ sur milā ke gā rahī

zamīn-zādiyāñ

numū kī aañch meñ nahā.ī

narm giilī miTTiyoñ meñ

dhaan ke charāġh roptī huī

sunā rahī haiñ fasl-e-nau-bahār kī bashārateñ

daraḳht vajd meñ haiñ yuuñ

ki jaise jhūmte hue

sharāb-e-arġhavāñ ke said-mast

zamīn-zādiyāñ

sanā-o-hamd kī namī se lab bhigo bhigo

nahūsat-o-nigāh-e-bad

hasad kī aag se

tahaffuz-o-amān-o-ḳhair kī duā.eñ māñgtī huī

sunā rahī haiñ giit

ki koī muzhda-e-ḳhushā

bahār-e-ḳhush-gulu-kār raag chheḌtī huī

zamīn-zādiyāñ sunā rahī haiñ giit

samā.ateñ khulī rakho

sunahrī bāliyoñ meñ jab

farāz-e-lams-e-nāznīñ se lau-pazīr

mahakte daane baj uTheñ

to sun sako

zamīn-zādiyāñ sunā rahī haiñ giit

phuwar si baras rahi ghaTa ki narmiyon tale

fusun-taraazi-e-faza ke sur mein sur mila ke ga rahi

zamin-zadiyan

numu ki aanch mein nahai

narm gili miTTiyon mein

dhan ke charagh ropti hui

suna rahi hain fasl-e-nau-bahaar ki bashaaraten

daraKHt wajd mein hain yun

ki jaise jhumte hue

sharab-e-arghawan ke said-mast

zamin-zadiyan

sana-o-hamd ki nami se lab bhigo bhigo

nahusat-o-nigah-e-bad

hasad ki aag se

tahaffuz-o-aman-o-KHair ki duaen mangti hui

suna rahi hain git

ki koi muzhda-e-KHusha

bahaar-e-KHush-gulu-kar rag chheDti hui

zamin-zadiyan suna rahi hain git

samaaten khuli rakho

sunahri baaliyon mein jab

faraaz-e-lams-e-naznin se lau-pazir

mahakte dane baj uThen

to sun sako

zamin-zadiyan suna rahi hain git