zamir

ruuh nāpāk mirī qalb bhī nāpāk mirā

nafs-e-ammāra bahut ho gayā bebāk mirā

bojh meñ apne hī maazī ke dabā jaatā huuñ

apnī hī aag meñ ab ḳhud hī jalā jaatā huuñ

kis taraf jā.ūñ kahāñ dho.ūñ maiñ apnā dāman

mere maqtūl mire saath haiñ be-ġhusl-o-kafn

dekhtā huuñ shab-e-tārīk meñ jab maiñ taare

nok-e-neza pe nazar aate haiñ kitne bachche

aaj tak yaad haiñ mujh ko vo nigāheñ māsūm

in hī hāthoñ ne jinheñ kar diyā baḌh kar mādūm

chhātiyāñ maaoñ kī hañs hañs ke haiñ maiñ ne kāTīñ

haDDiyoñ se mirī talvār ne saḌkeñ pātīñ

apnī har zarb kā ab ḳhud hī nishāna huuñ maiñ

jurm unvān ho jis kā vo fasāna huuñ maiñ

maiñ ne ismat ke sanam ḳhānoñ ko mismār kiyā

apnī bahnoñ ko supurd-e-sar-e-bāzār kiyā

kitne mah-pāre hue ḳhud mirī zulmat kā shikār

kaun kar saktā hai ab mere gunāhoñ kā shumār

chauñk chauñk uThtā huuñ rātoñ ko maiñ aksar ab bhī

chīḳheñ rah rah ke mire kānoñ meñ aatī haiñ vahī

apne kirdār ko ab kaise bhulā.ūñ ai dost

apnī hī laash ko ab kaise uThā.ūñ ai dost

khaa.e jaatā hai mujhe ab mire maazī kā ḳhayāl

kyā mire jurm kī pādāsh hai is darja muhāl

ruh napak meri qalb bhi napak mera

nafs-e-ammara bahut ho gaya bebak mera

bojh mein apne hi mazi ke daba jata hun

apni hi aag mein ab KHud hi jala jata hun

kis taraf jaun kahan dhoun main apna daman

mere maqtul mere sath hain be-ghusl-o-kafn

dekhta hun shab-e-tarik mein jab main tare

nok-e-neza pe nazar aate hain kitne bachche

aaj tak yaad hain mujh ko wo nigahen masum

in hi hathon ne jinhen kar diya baDh kar madum

chhatiyan maon ki hans hans ke hain main ne kaTin

haDDiyon se meri talwar ne saDken patin

apni har zarb ka ab KHud hi nishana hun main

jurm unwan ho jis ka wo fasana hun main

main ne ismat ke sanam KHanon ko mismar kiya

apni bahnon ko supurd-e-sar-e-bazar kiya

kitne mah-pare hue KHud meri zulmat ka shikar

kaun kar sakta hai ab mere gunahon ka shumar

chaunk chaunk uThta hun raaton ko main aksar ab bhi

chiKHen rah rah ke mere kanon mein aati hain wahi

apne kirdar ko ab kaise bhulaun ai dost

apni hi lash ko ab kaise uThaun ai dost

khae jata hai mujhe ab mere mazi ka KHayal

kya mere jurm ki padash hai is darja muhaal