zanjir-e-ghulami

kahāñ tak ai sitamgar charḳh tadbīreñ ġhulāmī kī

ki ab bār-e-garāñ hai dil ko zanjīreñ ġhulāmī kī

sabaq detī haiñ āzādī kā tāsīreñ ġhulāmī kī

zabān-e-hāl se kahtī haiñ tasvīreñ ġhulāmī kī

ham apnā mulk apnā taḳht apnā taaj le leñge

kahe dete haiñ ham is saal meñ svārāj le leñge

rahegī ek qaum-e-ġhair kab tak hukmrāñ ham par

kahāñ tak hoñgī gūnā-gūñ sitam-ārā.iyāñ ham par

raheñ ḳhush qaid meñ ham aur hañse saarā jahāñ ham par

sunā ab aap ḳhush hoñ yā ḳhafā hoñ mehrbāñ ham par

ham apnā mulk apnā taḳht apnā taaj le leñge

kahe dete haiñ ham is saal meñ svārāj le leñge

bahut din tak uThā.e nāz-e-bejā aap ke ham ne

kaleja ab to chhalnī kar diyā hai ḳhanjar-e-ġham ne

huī bedār duniyā karvaTeñ badlī haiñ aalam ne

uThāyā hai ye beḌā ab hamārī qaum-e-be-dam ne

ham apnā mulk apnā taḳht apnā taaj le leñge

kahe dete haiñ ham is saal meñ svārāj le leñge

hamārā mulk hai is kī hukūmat haq hamārā hai

batāo to yahāñ par kaun sā hissa tumhārā hai

ki āzādī kī ḳhātir ham ko har iizā gavārā hai

ḳhudā ke fazl se rif.at pe qismat kā sitārā hai

ham apnā mulk apnā taḳht apnā taaj le leñge

kahe dete haiñ ham is saal meñ svārāj le leñge

ye sab āzād haiñ ab rang-e-āzādī dikhā.eñge

ki ab hindostāñ vaale fareboñ meñ na ā.eñge

mareñge jaan deñge ġham saheñge jail jā.eñge

magar ai 'zāhidā' ab jashn-e-āzādī manāeñge

ham apnā mulk apnā taḳht apnā taaj le leñge

kahe dete haiñ ham is saal meñ svārāj le leñge

kahan tak ai sitamgar charKH tadbiren ghulami ki

ki ab bar-e-garan hai dil ko zanjiren ghulami ki

sabaq deti hain aazadi ka tasiren ghulami ki

zaban-e-haal se kahti hain taswiren ghulami ki

hum apna mulk apna taKHt apna taj le lenge

kahe dete hain hum is sal mein swaraj le lenge

rahegi ek qaum-e-ghair kab tak hukmran hum par

kahan tak hongi guna-gun sitam-araiyan hum par

rahen KHush qaid mein hum aur hanse sara jahan hum par

suna ab aap KHush hon ya KHafa hon mehrban hum par

hum apna mulk apna taKHt apna taj le lenge

kahe dete hain hum is sal mein swaraj le lenge

bahut din tak uThae naz-e-beja aap ke hum ne

kaleja ab to chhalni kar diya hai KHanjar-e-gham ne

hui bedar duniya karwaTen badli hain aalam ne

uThaya hai ye beDa ab hamari qaum-e-be-dam ne

hum apna mulk apna taKHt apna taj le lenge

kahe dete hain hum is sal mein swaraj le lenge

hamara mulk hai is ki hukumat haq hamara hai

batao to yahan par kaun sa hissa tumhaara hai

ki aazadi ki KHatir hum ko har iza gawara hai

KHuda ke fazl se rifat pe qismat ka sitara hai

hum apna mulk apna taKHt apna taj le lenge

kahe dete hain hum is sal mein swaraj le lenge

ye sab aazad hain ab rang-e-azadi dikhaenge

ki ab hindostan wale farebon mein na aaenge

marenge jaan denge gham sahenge jail jaenge

magar ai 'zahida' ab jashn-e-azadi manaenge

hum apna mulk apna taKHt apna taj le lenge

kahe dete hain hum is sal mein swaraj le lenge