zara socho to kya hoga

zamīñ uḌtī phiregī āsmāñ nīche bichhā hogā

zarā socho to aisā hogā duniyā meñ to kyā hogā

sitāroñ ko pakaḌ kar log kamroñ meñ sajā.eñge

havā ko bāñdh kar rakkheñge garmī meñ chillā.eñge

kabhī sūraj nahīñ niklā to sustī kī sazā deñge

uThak-baiThak karā.eñge use murġhā banā deñge

kabhī kar de man.a jo chāñd rātoñ meñ nikalne se

agar inkār kar deñ saare mausam rut badalne se

kahe machhlī ki maiñ jā.ūñgī apne pair par chal kar

agar kachhvā kahe mujh ko nikālo ḳhol se bāhar

lagā leñ loud-speaker agar bādal garajne ko

kaheñ bijlī nahīñ hai ā.eñge ham kal barasne ko

parinde ḳhud chalā kar gāḌiyāñ jaa.eñ jahāñ chāheñ

aur hāthī uḌte phirne ko baḌā sā pañkh lagvā.eñ

zarā socho to aisā hone lag jaa.e to kaisā ho

zamīñ par khāne piine kā na ho kuchh sirf paisa ho

agar har ek vo karne lage jo us kā dil chāhe

to kā.enāt kī har shai jagah se apnī hil jaa.e

magar allāh ne har chiiz ko qaabū meñ rakkhā hai

nizām-e-zindagī 'safdar' tabhī to itnā achchhā hai

zamin uDti phiregi aasman niche bichha hoga

zara socho to aisa hoga duniya mein to kya hoga

sitaron ko pakaD kar log kamron mein sajaenge

hawa ko bandh kar rakkhenge garmi mein chillaenge

kabhi suraj nahin nikla to susti ki saza denge

uThak-baiThak karaenge use murgha bana denge

kabhi kar de mana jo chand raaton mein nikalne se

agar inkar kar den sare mausam rut badalne se

kahe machhli ki main jaungi apne pair par chal kar

agar kachhwa kahe mujh ko nikalo KHol se bahar

laga len loud-speaker agar baadal garajne ko

kahen bijli nahin hai aaenge hum kal barasne ko

parinde KHud chala kar gaDiyan jaen jahan chahen

aur hathi uDte phirne ko baDa sa pankh lagwaen

zara socho to aisa hone lag jae to kaisa ho

zamin par khane pine ka na ho kuchh sirf paisa ho

agar har ek wo karne lage jo us ka dil chahe

to kaenat ki har shai jagah se apni hil jae

magar allah ne har chiz ko qabu mein rakkha hai

nizam-e-zindagi 'safdar' tabhi to itna achchha hai