zard laDki ka chehra

munjamid ḳhuun jab surḳh se kal siyah ho gayā

ḳhāk-e-pā vāqi.a ho gayā

zard laḌkī kā chehra farishtoñ ne dekhā thā

rangoñ kī tartīb meñ

jaane pahchāne chehroñ se merī mulāqāt jab ajnabī sī lagī

aa.ina dekhne ke liye maiñ uThā aa.ina ho gayā

tīrgī se guzartī huī raushnī barg-e-asrār thī

aañkh ke sāmne raushnī ḳhuun thī

ḳhuun pahle girā munjamid ho gayā phir siyah ho gayā

zard laḌkī kā chehra

guzartā huā barg-e-asrār thā

rahguzar se lapak kar makāñ meñ gayā

phir darīche meñ ubhrā

farishtoñ ne dekhā thā

maiñ ne bhī dekhā thā

maiñ bhī farishta thā

kal ke fasāne kī tartīb meñ lafz mujh se judā the

magar aaj mere haiñ kyoñ aaj bhī ajnabī ho ga.e un ko kyā ho gayā

un ko kyā ho gayā

munjamid ḳhuun pahle siyah ho gayā

phir faqat vāqi.a thā

magar zard laḌkī kā chehra ajab naqsh thā

maiñ miTātā thā lekin vo miTtā na thā

diid kā hādisa pahle manzar banā

phir faqat ek manzar se be-kār sā silsila ho gayā

zard laḌkī kā chehra ḳhudā se baḌā ḳhvāb thā

munjamid KHun jab surKH se kal siyah ho gaya

KHak-e-pa waqia ho gaya

zard laDki ka chehra farishton ne dekha tha

rangon ki tartib mein

jaane pahchane chehron se meri mulaqat jab ajnabi si lagi

aaina dekhne ke liye main uTha aaina ho gaya

tirgi se guzarti hui raushni barg-e-asrar thi

aankh ke samne raushni KHun thi

KHun pahle gira munjamid ho gaya phir siyah ho gaya

zard laDki ka chehra

guzarta hua barg-e-asrar tha

rahguzar se lapak kar makan mein gaya

phir dariche mein ubhra

farishton ne dekha tha

main ne bhi dekha tha

main bhi farishta tha

kal ke fasane ki tartib mein lafz mujh se juda the

magar aaj mere hain kyon aaj bhi ajnabi ho gae un ko kya ho gaya

un ko kya ho gaya

munjamid KHun pahle siyah ho gaya

phir faqat waqia tha

magar zard laDki ka chehra ajab naqsh tha

main miTata tha lekin wo miTta na tha

did ka hadisa pahle manzar bana

phir faqat ek manzar se be-kar sa silsila ho gaya

zard laDki ka chehra KHuda se baDa KHwab tha