zard suraj

muhīb rūhoñ ke qahqahoñ se

ma.āsir-e-jāñ laraz uThe haiñ

lahū kī raftār zahr-e-qātil kī dhaar ban kar

dil kī gahrā.iyoñ meñ paiham utar rahī hai

haDDiyāñ āgahī kī bedār aag meñ phir pighal rahī haiñ

hayāt se be-ḳhabar fazāoñ meñ

jism tahlīl ho rahā hai

shab-e-siyah ke Darāvne fāsloñ se laTkī huī

shappra-chashm ārzūeñ ye chāhtī haiñ

ki tīrgī ko maiñ ruuh apnī faroḳht kar duuñ

aur us ujāle ko bhuul jā.ūñ

jo ab bhī merā masīh-e-mau.ūd-e-jism-o-jāñ hai

muhīb rūhoñ ke qahqahoñ ne

merī āvāz chhīn lī hai

maiñ ghar kī dīvār par nigāheñ jamā.e baiThā huuñ

jaise mere tamām alfāz ghar kī dīvār meñ nihāñ haiñ

muhīb rūhoñ ke qahqahoñ meñ

kuchh ajnabī ajnabī sadā.eñ ubhar rahī haiñ

vaqt kā chaak chal rahā hai

zamīn kī saañs ukhaḌ rahī hai

maiñ sochtā huuñ

vo zard sūraj na-jāne kab aa.egā

ki jis kā

kitāb-e-sayyārgāñ meñ va.ada kiyā gayā hai

kitāb-e-sayyārgāñ ke mālik

maiñ is añdhere se thak gayā huuñ

muhib ruhon ke qahqahon se

maasir-e-jaan laraz uThe hain

lahu ki raftar zahr-e-qatil ki dhaar ban kar

dil ki gahraiyon mein paiham utar rahi hai

haDDiyan aagahi ki bedar aag mein phir pighal rahi hain

hayat se be-KHabar fazaon mein

jism tahlil ho raha hai

shab-e-siyah ke Darawne faslon se laTki hui

shappra-chashm aarzuen ye chahti hain

ki tirgi ko main ruh apni faroKHt kar dun

aur us ujale ko bhul jaun

jo ab bhi mera masih-e-mauud-e-jism-o-jaan hai

muhib ruhon ke qahqahon ne

meri aawaz chhin li hai

main ghar ki diwar par nigahen jamae baiTha hun

jaise mere tamam alfaz ghar ki diwar mein nihan hain

muhib ruhon ke qahqahon mein

kuchh ajnabi ajnabi sadaen ubhar rahi hain

waqt ka chaak chal raha hai

zamin ki sans ukhaD rahi hai

main sochta hun

wo zard suraj na-jaane kab aaega

ki jis ka

kitab-e-sayyargan mein wada kiya gaya hai

kitab-e-sayyargan ke malik

main is andhere se thak gaya hun