zard zaiqa

ham aurteñ ek dūsre kī dushman haiñ

magar sab nahīñ

tum ham sab se mohabbat karte ho

magar hamesha nahīñ

mausam kis qadar jald biit jaate haiñ

aur mohabbateñ us se bhī jald

ab ye bhī guzre zamāne kī baat hai

jab mere chehre kī rangat aur tumhārī āñkhoñ ke rang ke darmiyān

ek be-nām rishta thā

aur merā sarāpā pas-e-manzar ko mādūm kar detā thā

fāsle ne mujhe manzar-nāme ke ek nuqta-e-mahz meñ tabdīl kar diyā hai

aur tum

mujhe ḳhānoñ meñ taqsīm karnā siikh rahe ho

aah mere bāġhoñ ke ber surḳh haiñ

aur zard zā.iqoñ kī justujū

tumhāre halaq ko khaTTā kar rahī hai

hum aurten ek dusre ki dushman hain

magar sab nahin

tum hum sab se mohabbat karte ho

magar hamesha nahin

mausam kis qadar jald bit jate hain

aur mohabbaten us se bhi jald

ab ye bhi guzre zamane ki baat hai

jab mere chehre ki rangat aur tumhaari aankhon ke rang ke darmiyan

ek be-nam rishta tha

aur mera sarapa pas-e-manzar ko madum kar deta tha

fasle ne mujhe manzar-name ke ek nuqta-e-mahz mein tabdil kar diya hai

aur tum

mujhe KHanon mein taqsim karna sikh rahe ho

aah mere baghon ke ber surKH hain

aur zard zaiqon ki justuju

tumhaare halaq ko khaTTa kar rahi hai