zarra

dasht kī be-pāyāñ vus.at meñ

kohsāroñ ke dāman meñ

zarra

apne hone aur na hone kā dukh jhel rahā thā

zarra jo ḳhud apne vajūd meñ

ek mukammal duniyā hai

jis ke batn meñ

saarā nizām-e-shams-o-qamar poshīda hai

jis kī vahdat ke siine meñ

nazar na aane vaalī kasrat kā jalva hai

ahl-e-nazar ne pichhlī sadī meñ

is pāmāl zamīr ke andar

is be-nām vajūd meñ muzmar

us tāqat kī gavāhī dī hai

jo is ke bedār ḳhamīr meñ

sadiyoñ tak ḳhvābīda rahī hai

ahl-e-hunar ahl-e-hikmat ne

jab is ḳhufta quvvat kā idrāk kiyā

zarre kā dil chaak kiyā

sadiyoñ kī sahmī huī

nā-āsūda mahrūmī ko be-bāk kiyā

isī tavānā.ī kī badaulat

isī haqīr se be-tauqīr se

ḳhākistar zarre ne

ik din

hiroshima ko ḳhaak kiyā

dasht ki be-payan wusat mein

kohsaron ke daman mein

zarra

apne hone aur na hone ka dukh jhel raha tha

zarra jo KHud apne wajud mein

ek mukammal duniya hai

jis ke batn mein

sara nizam-e-shams-o-qamar poshida hai

jis ki wahdat ke sine mein

nazar na aane wali kasrat ka jalwa hai

ahl-e-nazar ne pichhli sadi mein

is pamal zamir ke andar

is be-nam wajud mein muzmar

us taqat ki gawahi di hai

jo is ke bedar KHamir mein

sadiyon tak KHwabida rahi hai

ahl-e-hunar ahl-e-hikmat ne

jab is KHufta quwwat ka idrak kiya

zarre ka dil chaak kiya

sadiyon ki sahmi hui

na-asuda mahrumi ko be-bak kiya

isi tawanai ki badaulat

isi haqir se be-tauqir se

KHakistar zarre ne

ek din

hiroshima ko KHak kiya