zawal-e-ahd-e-tamanna

havā meñ uḌtā hai kājal fazā hai huzn se bojhal

har ek kunj kī halchal kohar meñ Duub chalī hai

vo kahkashāñ hai vo is par sahāb-e-nūr kā bārāñ

ye apnā ḳhāk-basar ghar ye apnī tiira galī hai

vo maah niklā pa us kā faroġh bahr-e-falak hai

nasīb-e-arz to shāyad takaddur-e-azalī hai

na jaane kab se ḳhayāloñ meñ apne mahv khaḌī hai

vo ik sakhī jo nazākat meñ motiyā kī kalī hai

na phuul bāloñ meñ gūñdhe na ghar meñ diip jalāyā

sharīk-e-ġham ne manāyā magar na un se manī vo

vo thak ke laTe ga.e ḳhvāb ke nagar ko sudhāre

magar darīche meñ apne khaḌī sisaktī rahī vo

sitāre karte rahe chashmakeñ to kuchh bhī na bolī

ki ek shāḳh thī ġhunchoñ ke ḳhuuñ meñ Duubī huī vo

na jaane dānish-o-dīn-o-hunar kā narḳh ho ab kyā

ravāñ paak kī qīmat to jag meñ haar ga.ī vo

na DhūñD paa.ī mudāvā-e-zaḳhm-zār-e-tamannā

samajh sakī na taqāzā-e-ahd-e-tifl-kushī vo

ufuq se tā-ba-ufuq zard nā-murād bagūle

ufuq se tā-ba-ufuq ik muhīb sog hai taarī

ufuq se tā-ba-ufuq sañg-dil kaThor chaTāneñ

har ek sahar hai sayyād har tilism shikārī

har ek jaada meñ bosīda ustaḳhvānoñ ke TukḌe

kahīñ hai soḳhta mahmil kahīñ shikasta amārī

na jahl se koī Dhāras na āgahī se tasallī

na vaqt-e-nāla-o-zārī na hosh-e-zaḳhm-shumārī

na koī nand unheñ apnī jhoñpaḌī meñ panāh de

jo shyām lāDle kal the vo aaj sab pe haiñ bhārī

na un kī aag se gulshan koī zuhūr meñ aa.e

na un ke paañv ragaḌne se rūd-e-āb ho jaarī

na un ko tiira kueñ se nikāleñ qāfile vaale

na nīl-e-vaqt kī maujoñ ko un kī jaan ho pyārī

na un ke dāman-e-ismat ko thaam lene se chhā.eñ

ghaTā.eñ tishna-dahan bāñjh vādiyoñ pe hamārī

na un kī chashm-e-karam sarsar-o-sumūm meñ ghole

safā-e-bād-e-sahar dam-e-surūr bād-e-bahārī

har ik umañg kī titlī ne jaise jog liyā hai

har ik umiid ke jugnū ne tan pe raakh malī hai

hazār saala masāfat ḳhayāl-o-vahm-o-gumāñ kī

aur is ke baad bhī pinhāñ shuā-e-lam-yazlī hai

jo aas tīra-guphāoñ meñ jañgaloñ meñ thī rahbar

vo jagmagātī huī nagriyoñ meñ ruuTh chalī hai

ye māmtā hai ki sho.aloñ meñ koī phuul kī pattī

hayāt hai ki abhāgan ye koī kokh jalī hai

ye kā.enāt hai kitnī aziim kitnī kushāda

magar hamāre tasavvur ke tañgnā meñ Dhalī hai

na jaane kab se ḳhayāloñ meñ apne mahv khaḌī hai

vo ik sakhī jo nazākat meñ motiyā kī kalī hai

hawa mein uDta hai kajal faza hai huzn se bojhal

har ek kunj ki halchal kohar mein Dub chali hai

wo kahkashan hai wo is par sahab-e-nur ka baran

ye apna KHak-basar ghar ye apni tera gali hai

wo mah nikla pa us ka farogh bahr-e-falak hai

nasib-e-arz to shayad takaddur-e-azali hai

na jaane kab se KHayalon mein apne mahw khaDi hai

wo ek sakhi jo nazakat mein motiya ki kali hai

na phul baalon mein gundhe na ghar mein dip jalaya

sharik-e-gham ne manaya magar na un se mani wo

wo thak ke laTe gae KHwab ke nagar ko sudhaare

magar dariche mein apne khaDi sisakti rahi wo

sitare karte rahe chashmaken to kuchh bhi na boli

ki ek shaKH thi ghunchon ke KHun mein Dubi hui wo

na jaane danish-o-din-o-hunar ka narKH ho ab kya

rawan pak ki qimat to jag mein haar gai wo

na DhunD pai mudawa-e-zaKHm-zar-e-tamanna

samajh saki na taqaza-e-ahd-e-tifl-kushi wo

ufuq se ta-ba-ufuq zard na-murad bagule

ufuq se ta-ba-ufuq ek muhib sog hai tari

ufuq se ta-ba-ufuq sang-dil kaThor chaTanen

har ek sahar hai sayyaad har tilism shikari

har ek jada mein bosida ustaKHwanon ke TukDe

kahin hai soKHta mahmil kahin shikasta amari

na jahl se koi Dhaaras na aagahi se tasalli

na waqt-e-nala-o-zari na hosh-e-zaKHm-shumari

na koi nand unhen apni jhonpaDi mein panah de

jo shyam laDle kal the wo aaj sab pe hain bhaari

na un ki aag se gulshan koi zuhur mein aae

na un ke panw ragaDne se rud-e-ab ho jari

na un ko tera kuen se nikalen qafile wale

na nil-e-waqt ki maujon ko un ki jaan ho pyari

na un ke daman-e-ismat ko tham lene se chhaen

ghaTaen tishna-dahan banjh wadiyon pe hamari

na un ki chashm-e-karam sarsar-o-sumum mein ghole

safa-e-baad-e-sahar dam-e-surur baad-e-bahaari

har ek umang ki titli ne jaise jog liya hai

har ek umid ke jugnu ne tan pe rakh mali hai

hazar sala masafat KHayal-o-wahm-o-guman ki

aur is ke baad bhi pinhan shua-e-lam-yazli hai

jo aas tira-guphaon mein jangalon mein thi rahbar

wo jagmagati hui nagriyon mein ruTh chali hai

ye mamta hai ki shoalon mein koi phul ki patti

hayat hai ki abhagan ye koi kokh jali hai

ye kaenat hai kitni azim kitni kushada

magar hamare tasawwur ke tangna mein Dhali hai

na jaane kab se KHayalon mein apne mahw khaDi hai

wo ek sakhi jo nazakat mein motiya ki kali hai