zawal ki aaKHiri chiKH

chhaTī baar jab maiñ ne darvāza kholā

to ik chīḳh mere badan ke masāmoñ se chimTī

badan ke añdheroñ meñ utrī

mirā jism us chīḳh ke tund panjoñ se jhulsī huī

be-karāñ chīḳh thā

maiñ laraztā huā kohna gumbad se niklā

aur chīḳh mere badan se siyāh ghaas kī tarah niklī

badan ke karoḌoñ masāmoñ ke muñh par

siyāh chīḳh kā surḳh jañgal ugā thā

koī chīḳh ab bhī ubhartī thī jis se

gumbad ke dīvār-o-dar kāñpte the

koī shai dikhā.ī nahīñ de rahī thī

faqat ik dhuāñ thā

jo gumbad ke sūrāḳh se apne paañv nikāle

havāoñ ke be-dāġh sīnoñ se chimTā huā thā

sātvīñ baar phir maiñ ne darvāza kholā

to mere lahū kī har ik buuñd meñ

sātvīñ baar phir sarsarātī huī chīḳh guzrī

maiñ ne dekhā ki gumbad meñ mailī zamīñ par

naza.a kī hālat meñ ik laash hai

jis ne ab sātvīñ baar mere badan meñ

sātvīñ chīḳh kā garm laavā utārā

ye zavāl kī āḳhirī sard chīḳhoñ kī ik chīḳh thī

chhaTi bar jab main ne darwaza khola

to ek chiKH mere badan ke masamon se chimTi

badan ke andheron mein utri

mera jism us chiKH ke tund panjon se jhulsi hui

be-karan chiKH tha

main larazta hua kohna gumbad se nikla

aur chiKH mere badan se siyah ghas ki tarah nikli

badan ke karoDon masamon ke munh par

siyah chiKH ka surKH jangal uga tha

koi chiKH ab bhi ubharti thi jis se

gumbad ke diwar-o-dar kanpte the

koi shai dikhai nahin de rahi thi

faqat ek dhuan tha

jo gumbad ke suraKH se apne panw nikale

hawaon ke be-dagh sinon se chimTa hua tha

satwin bar phir main ne darwaza khola

to mere lahu ki har ek bund mein

satwin bar phir sarsaraati hui chiKH guzri

main ne dekha ki gumbad mein maili zamin par

naza ki haalat mein ek lash hai

jis ne ab satwin bar mere badan mein

satwin chiKH ka garm lawa utara

ye zawal ki aaKHiri sard chiKHon ki ek chiKH thi