zehra ne bahut din se kuchh bhi nahin likkha hai

'zahra' ne bahut din se kuchh bhī nahīñ likkhā hai

hālāñki dar-īñ-asnā kyā kuchh nahīñ dekhā hai

par likkhe to kyā likkhe? aur soche to kyā soche?

kuchh fikr bhī mub.ham hai kuchh haath laraztā hai

'zahra' ne bahut din se kuchh bhī nahīñ likkhā hai!

dīvānī nahīñ itnī jo muñh meñ ho bak jaa.e

chup-shāh kā roza bhī yūñhī nahīñ rakkhā hai

būḌhī bhī nahīñ itnī is tarah vo thak jaa.e

ab jaan ke us ne ye andāz banāyā hai

har chiiz bhulāve ke sandūq meñ rakh dī hai

āsānī se jiine kā achchhā ye tarīqa hai

'zahra' ne bahut din se kuchh bhī nahīñ likkhā hai!

ghar baar, samajhtī thii, qil.a hai hifāzat kā

dekhā ki grihastī bhī miTTī kā khilaunā hai

miTTī ho ki patthar ho hiirā ho ki motī ho

ghar-bār ke mālik kā ghar-bār pe qabza hai

ehsās-e-hukūmat ke iz.hār kā kyā kahnā!

in.aam hai maz.hab kā jo haath meñ koḌā hai

'zehrā' ne bahut din se kuchh bhī nahīñ likkhā hai!

dīvār pe Tāñgā thā farmān rifāqat kā

kyā vaqt ke dariyā ne dīvār ko Dhāyā hai

farmān-e-rifāqat kī taqdīs bas itnī hai

ik jumbish-e-lab par hai, rishta jo azal kā hai

'zahra' ne bahut din se kuchh bhī nahīñ likkhā hai!

do beToñ ko kyā paalā nādāñ ye samajhtī thī

is daulat-e-duniyā kī mālik vahī tanhā hai

par vaqt ne ā.īna kuchh aisā dikhāyā hai

tasvīr kā ye pahlū ab sāmne aayā hai

baḌhte hue bachchoñ par khultī huī duniyā hai

khultī huī duniyā kā har baab tamāsha hai

maañ baap kī sūrat to dekhā huā naqsha hai

dekhe hue naqshe kā har rañg purānā hai

'zehrā' ne bahut din se kuchh bhī nahīñ likkhā hai!

sochā thā bahan bhaa.ī dariyā haiñ mohabbat ke

dekhā ki kabhī dariyā rasta bhī badaltā hai

bhaa.ī bhī giraftār-e-majbūrī-e-ḳhidmat haiñ

bahnoñ pe bhī taarī hai qismat kā jo likkhā hai

ik maañ hai jo peḌoñ se bāteñ kiye jaatī hai

kahne ko haiñ das bachche aur phir bhī vo tanhā hai

'zehrā' ne bahut din se kuchh bhī nahīñ likkhā hai

'zahra' ne bahut din se kuchh bhi nahin likkha hai

haalanki dar-in-asna kya kuchh nahin dekha hai

par likkhe to kya likkhe? aur soche to kya soche?

kuchh fikr bhi mubham hai kuchh hath larazta hai

'zahra' ne bahut din se kuchh bhi nahin likkha hai!

diwani nahin itni jo munh mein ho bak jae

chup-shah ka roza bhi yunhi nahin rakkha hai

buDhi bhi nahin itni is tarah wo thak jae

ab jaan ke us ne ye andaz banaya hai

har chiz bhulawe ke sanduq mein rakh di hai

aasani se jine ka achchha ye tariqa hai

'zahra' ne bahut din se kuchh bhi nahin likkha hai!

ghar bar, samajhti thi, qila hai hifazat ka

dekha ki grihasti bhi miTTi ka khilauna hai

miTTi ho ki patthar ho hira ho ki moti ho

ghar-bar ke malik ka ghar-bar pe qabza hai

ehsas-e-hukumat ke izhaar ka kya kahna!

inam hai mazhab ka jo hath mein koDa hai

'zehra' ne bahut din se kuchh bhi nahin likkha hai!

diwar pe Tanga tha farman rifaqat ka

kya waqt ke dariya ne diwar ko Dhaya hai

farman-e-rifaqat ki taqdis bas itni hai

ek jumbish-e-lab par hai, rishta jo azal ka hai

'zahra' ne bahut din se kuchh bhi nahin likkha hai!

do beTon ko kya pala nadan ye samajhti thi

is daulat-e-duniya ki malik wahi tanha hai

par waqt ne aaina kuchh aisa dikhaya hai

taswir ka ye pahlu ab samne aaya hai

baDhte hue bachchon par khulti hui duniya hai

khulti hui duniya ka har bab tamasha hai

man bap ki surat to dekha hua naqsha hai

dekhe hue naqshe ka har rang purana hai

'zehra' ne bahut din se kuchh bhi nahin likkha hai!

socha tha bahan bhai dariya hain mohabbat ke

dekha ki kabhi dariya rasta bhi badalta hai

bhai bhi giraftar-e-majburi-e-KHidmat hain

bahnon pe bhi tari hai qismat ka jo likkha hai

ek man hai jo peDon se baaten kiye jati hai

kahne ko hain das bachche aur phir bhi wo tanha hai

'zehra' ne bahut din se kuchh bhi nahin likkha hai