zist sarae

kuchh gharoñ ke lavāzimāt muḳhtasar hote haiñ

ek bistar jis ke saath

aap ko niiñd alāhada se ḳharīdnī

na paḌe

ek gul-dān jis meñ itne phuul rakhe jā sakeñ

ki agar aap ko hangāmī hālat meñ phūloñ kī

zarūrat pesh aa jaa.e to aap ko kisī bahār

kā intizār na karnā paḌe

ek chhat vaalā pañkhā jise

aap sone se pahle apnī kahānī sunā sakeñ

ek chūlhā jis par aap

apne safar ke izāfī hissoñ ko jalā sakeñ

ek refrigerator jis meñ aap

sharāb rakh kar bhuul jaane kā ḳhadsha

mol le leñ

ek T v jis par aap ḳhabar-nāme

meñ apne naam kī ḳhabar sunñe

ke intizār meñ zindagī basar kar deñ

kuchh darvāze jin par aap apne

paas jam.a-shuda bahut sī dastakoñ ko ḳharch

kar sakeñ

kuchh khiḌkiyāñ jin meñ se

aap kabhī kabhār chāñd ko dekh sakeñ

yā mānūs samt se aane vaalī ḳhushbū

ko rāsta de sakeñ

ek raushan-dān jahāñ koī bhī parinda

aa kar ghoñsla banā sake aur aap ko batā sake

ki aap kā ghar kitnī tezī se simaTtā

huā aap kī taraf baḌh rahā hai

ek ghaḌī jise dekh kar aap parinde kī

baat par ġhaur kar sakeñ

ek kursī jis par baiTh kar aap

raushan-dān meñ rahte parinde ke saath

guftugū kar sakeñ

ek mez jo aap ke hāthoñ ke

lams ko pahchān sake

ek almārī jis meñ aap apne kapḌoñ

ke saath apne ḳhvāboñ ko bhī hanger

par laTkā sakeñ

kuchh pantings jin ko dekh kar

aap har rang kā bosa apnī mahbūba

ke liye mahfūz kar sakeñ

kafka kī kuchh kitābeñ jinheñ paḌh kar

hamesha aap raushan-dān meñ aane vaale

parinde ke saath gale lag kar ro sakeñ

kuchh note-bōks jin par bahut se mohabbat ke

ḳhutūt likhe ga.e jo kabhī post nahīñ hue

kuchh bulb jin ko raushan karke aap apnī ḳhud-kushī

kā ek achchhā sā note likh sakeñ

aur vo note raushan-dān meñ baiThe parinde

ko dete vaqt aap kah sakeñ ki

ye note kisī qarībī haspatāl ke pate par

post kar do shāyad merī laash

se mere ghar kā naqsha nikāl kar pheñk diyā

jaa.e aur mujhe murda-ḳhāne meñ apnā

bistar muntaḳhab karne meñ koī mushkil pesh na aa.e

kuchh gharon ke lawazimat muKHtasar hote hain

ek bistar jis ke sath

aap ko nind alahada se KHaridni

na paDe

ek gul-dan jis mein itne phul rakhe ja saken

ki agar aap ko hangami haalat mein phulon ki

zarurat pesh aa jae to aap ko kisi bahaar

ka intizar na karna paDe

ek chhat wala pankha jise

aap sone se pahle apni kahani suna saken

ek chulha jis par aap

apne safar ke izafi hisson ko jala saken

ek refrigerator jis mein aap

sharab rakh kar bhul jaane ka KHadsha

mol le len

ek T w jis par aap KHabar-name

mein apne nam ki KHabar sunne

ke intizar mein zindagi basar kar den

kuchh darwaze jin par aap apne

pas jama-shuda bahut si dastakon ko KHarch

kar saken

kuchh khiDkiyan jin mein se

aap kabhi kabhaar chand ko dekh saken

ya manus samt se aane wali KHushbu

ko rasta de saken

ek raushan-dan jahan koi bhi parinda

aa kar ghonsla bana sake aur aap ko bata sake

ki aap ka ghar kitni tezi se simaTta

hua aap ki taraf baDh raha hai

ek ghaDi jise dekh kar aap parinde ki

baat par ghaur kar saken

ek kursi jis par baiTh kar aap

raushan-dan mein rahte parinde ke sath

guftugu kar saken

ek mez jo aap ke hathon ke

lams ko pahchan sake

ek almari jis mein aap apne kapDon

ke sath apne KHwabon ko bhi hanger

par laTka saken

kuchh pantings jin ko dekh kar

aap har rang ka bosa apni mahbuba

ke liye mahfuz kar saken

kafka ki kuchh kitaben jinhen paDh kar

hamesha aap raushan-dan mein aane wale

parinde ke sath gale lag kar ro saken

kuchh note-books jin par bahut se mohabbat ke

KHutut likhe gae jo kabhi post nahin hue

kuchh bulb jin ko raushan karke aap apni KHud-kushi

ka ek achchha sa note likh saken

aur wo note raushan-dan mein baiThe parinde

ko dete waqt aap kah saken ki

ye note kisi qaribi haspatal ke pate par

post kar do shayad meri lash

se mere ghar ka naqsha nikal kar phenk diya

jae aur mujhe murda-KHane mein apna

bistar muntaKHab karne mein koi mushkil pesh na aae