زیست سرائے

کچھ گھروں کے لوازمات مختصر ہوتے ہیں

ایک بستر جس کے ساتھ

آپ کو نیند علاحدہ سے خریدنی

نہ پڑے

ایک گلدان جس میں اتنے پھول رکھے جا سکیں

کہ اگر آپ کو ہنگامی حالت میں پھولوں کی

ضرورت پیش آ جائے تو آپ کو کسی بہار

کا انتظار نہ کرنا پڑے

ایک چھت والا پنکھا جسے

آپ سونے سے پہلے اپنی کہانی سنا سکیں

ایک چولہا جس پر آپ

اپنے سفر کے اضافی حصوں کو جلا سکیں

ایک ریفریجریٹر جس میں آپ

شراب رکھ کر بھول جانے کا خدشہ

مول لے لیں

ایک ٹی وی جس پر آپ خبر نامے

میں اپنے نام کی خبر سننے

کے انتظار میں زندگی بسر کر دیں

کچھ دروازے جن پر آپ اپنے

پاس جمع شدہ بہت سی دستکوں کو خرچ

کر سکیں

کچھ کھڑکیاں جن میں سے

آپ کبھی کبھار چاند کو دیکھ سکیں

یا مانوس سمت سے آنے والی خوشبو

کو راستہ دے سکیں

ایک روشن دان جہاں کوئی بھی پرندہ

آ کر گھونسلہ بنا سکے اور آپ کو بتا سکے

کہ آپ کا گھر کتنی تیزی سے سمٹتا

ہوا آپ کی طرف بڑھ رہا ہے

ایک گھڑی جسے دیکھ کر آپ پرندے کی

بات پر غور کر سکیں

ایک کرسی جس پر بیٹھ کر آپ

روشن دان میں رہتے پرندے کے ساتھ

گفتگو کر سکیں

ایک میز جو آپ کے ہاتھوں کے

لمس کو پہچان سکے

ایک الماری جس میں آپ اپنے کپڑوں

کے ساتھ اپنے خوابوں کو بھی ہینگر

پر لٹکا سکیں

کچھ پینٹنگز جن کو دیکھ کر

آپ ہر رنگ کا بوسہ اپنی محبوبہ

کے لئے محفوظ کر سکیں

کافکا کی کچھ کتابیں جنہیں پڑھ کر

ہمیشہ آپ روشن دان میں آنے والے

پرندے کے ساتھ گلے لگ کر رو سکیں

کچھ نوٹ بکس جن پر بہت سے محبت کے

خطوط لکھے گئے جو کبھی پوسٹ نہیں ہوئے

کچھ بلب جن کو روشن کرکے آپ اپنی خودکشی

کا ایک اچھا سا نوٹ لکھ سکیں

اور وہ نوٹ روشن دان میں بیٹھے پرندے

کو دیتے وقت آپ کہہ سکیں کہ

یہ نوٹ کسی قریبی ہسپتال کے پتے پر

پوسٹ کر دو شاید میری لاش

سے میرے گھر کا نقشہ نکال کر پھینک دیا

جائے اور مجھے مردہ خانے میں اپنا

بستر منتخب کرنے میں کوئی مشکل پیش نہ آئے