ذکر آرزوؔ

پھر لہو بہنے لگا آنکھوں سے کیا پھر چھڑ گیا

حلقۂ احباب میں ذکر وصال آرزوؔ

عالم شعر و سخن میں آج حاصل ہے کسے

قدرت تخلیق و پرواز خیال آرزوؔ

اللہ اللہ کس وفور شوق سے اہل شعور

دیکھتے ہیں حسن معنی میں جمال آرزوؔ

آج بھی ہے شہسواران ادب کے واسطے

مشعل راہ سخن حسن کمال آرزوؔ

آرزوؔ زندہ نہیں پر زندۂ جاوید ہے

گلشن شعر و تغزل میں نہال آرزوؔ

کروٹیں بدلا کرے گا آسماں لاکھوں برس

جب کہیں ممکن ہے پیدا ہو مثال آرزو

زیب دیواں ہی نہیں ہر قاش دل پر نقش ہے

حرف قول آرزوؔ لفظ مقال آرزوؔ

فکر میری نارسا ہے علم میرا ناتمام

مجھ سے ممکن ہی نہیں شرح کمال آرزوؔ

صحبت حور و ملک اے اشکؔ خوش آئے نہ کیوں

ملتے جلتے تھے فرشتوں سے خصال آرزوؔ