zimmedari

kaash tū aa ke dekh saktā kabhī

aaj kitnī badal ga.ī huuñ maiñ

chaar din kī tirī judā.ī meñ

kis qadar ab sañbhal ga.ī huuñ maiñ

ik zamāna thā jab tirā saaya

mere sar par thā bargadoñ kī tarah

kitnī be-fikr zindagī thī mirī

hosh apnā na thā kisī kā ḳhayāl

apne kamre meñ bas paḌe rahnā

rāt-din sirf shā.irī karnā

vaqt se sonā jāgnā kaisā

vaqt ke pīchhe bhāgnā kaisā

zindagī-bhar jo tū ne samjhāyā

vaqt ne sab sīkhā diyā pal meñ

ab yahāñ kuchh nahīñ hai be-tartīb

saare kamre haiñ ab salīqe se

ek ik chiiz ab hai apnī jagah

saare ghar meñ tujhe milegā shu.ūr

fāltū pañkhe ab nahīñ chalte

bulb ab be-sabab nahīñ jalte

jab nikaltī huuñ maiñ kitchen se kabhī

dhyān se gas band kartī huuñ

ab maiñ jab iron uThātī huuñ

mujh se kapḌe bhī ab nahīñ jalte

sāf-suthrā hai ghar kā har konā

mujh ko sab kī hai is qadar parvāh

sochtī huuñ ki tere jaate hī

kaise sāñche meñ Dhal ga.ī huuñ maiñ

haa.e kaisī badal ga.ī huuñ maiñ

kaash tū aa ke dekh saktā kabhī

kash tu aa ke dekh sakta kabhi

aaj kitni badal gai hun main

chaar din ki teri judai mein

kis qadar ab sanbhal gai hun main

ek zamana tha jab tera saya

mere sar par tha bargadon ki tarah

kitni be-fikr zindagi thi meri

hosh apna na tha kisi ka KHayal

apne kamre mein bas paDe rahna

raat-din sirf shairi karna

waqt se sona jagna kaisa

waqt ke pichhe bhagna kaisa

zindagi-bhar jo tu ne samjhaya

waqt ne sab sikha diya pal mein

ab yahan kuchh nahin hai be-tartib

sare kamre hain ab saliqe se

ek ek chiz ab hai apni jagah

sare ghar mein tujhe milega shuur

faltu pankhe ab nahin chalte

bulb ab be-sabab nahin jalte

jab nikalti hun main kitchen se kabhi

dhyan se gas band karti hun

ab main jab iron uThati hun

mujh se kapDe bhi ab nahin jalte

saf-suthra hai ghar ka har kona

mujh ko sab ki hai is qadar parwah

sochti hun ki tere jate hi

kaise sanche mein Dhal gai hun main

hae kaisi badal gai hun main

kash tu aa ke dekh sakta kabhi