zimmedari

maañ beTe ke darmiyān ek manzūm mukālima

beTā

bas bahut paḌh liyā kuchh bhuul nahīñ jā.ūñgā

maañ maiñ bas aaj se schōl nahīñ jā.uñgā

maañ

mere beTe mire ma.asūm se pyāre bachche

roz ik taaza bahāna nahīñ karte aise

achchhā mujh ko ye batāo hai pareshānī kyā

tum ko achchhī nahīñ lagtī koī ustānī kyā

kaun sī baat se jhunjhlā.e hue rahte ho

yuuñ jo schōl se uktā.e hue rahte ho

beTā

yuuñ to bachchoñ se hai schōl kā har class bharā

lekin in meñ na koī dost mirā yaar mirā

ek bhī merī tavajjoh nahīñ hāsil kartā

apnī bātoñ meñ koī bhī nahīñ shāmil kartā

maiñ ne dekhā hai chale jaate haiñ sab dekhte hī

merī maujūdgī jaise ki musībat hai koī

saare teachers bhī rahte haiñ ba-har-hāl ḳhafā

maiñ kisī vaqt unheñ ḳhush hī nahīñ kar paatā

ik na ik baat pe karte haiñ vo har roz jirah

vahāñ koī bhī nahīñ terī tarah merī tarah

maañ

mere beTe tumheñ schōl to jaanā hogā

jo ḳhafā haiñ unheñ har roz manānā hogā

beTā

maañ bhalā kyoñ maiñ ye rozāna kī takrār sahūñ

kyoñ bhalā rūThe hue logoñ ke hamrāh rahūñ

maañ

sab ko ḳhush rakhnā kisī ke liye āsān nahīñ

maiñ samajhtī huuñ ki is kā koī imkān nahīñ

lekin schōl to pābandī se jaao beTe

zimmedārī jo milī us ko nibhāo beTe

kyūñ-ki ta.alīm tumhāre liye hai kuchh aur hai ab

mere har roz jagāne kā hai kuchh aur sabab

ik taraf apnā ye uljhā dil-e-nāshād rakho

tum principal ho ye ik baat sadā yaad rakho

man beTe ke darmiyan ek manzum mukalima

beTa

bas bahut paDh liya kuchh bhul nahin jaunga

man main bas aaj se school nahin jaunga

man

mere beTe mere masum se pyare bachche

roz ek taza bahana nahin karte aise

achchha mujh ko ye batao hai pareshani kya

tum ko achchhi nahin lagti koi ustani kya

kaun si baat se jhunjhlae hue rahte ho

yun jo school se uktae hue rahte ho

beTa

yun to bachchon se hai school ka har class bhara

lekin in mein na koi dost mera yar mera

ek bhi meri tawajjoh nahin hasil karta

apni baaton mein koi bhi nahin shamil karta

main ne dekha hai chale jate hain sab dekhte hi

meri maujudgi jaise ki musibat hai koi

sare teachers bhi rahte hain ba-har-haal KHafa

main kisi waqt unhen KHush hi nahin kar pata

ek na ek baat pe karte hain wo har roz jirah

wahan koi bhi nahin teri tarah meri tarah

man

mere beTe tumhein school to jaana hoga

jo KHafa hain unhen har roz manana hoga

beTa

man bhala kyon main ye rozana ki takrar sahun

kyon bhala ruThe hue logon ke hamrah rahun

man

sab ko KHush rakhna kisi ke liye aasan nahin

main samajhti hun ki is ka koi imkan nahin

lekin school to pabandi se jao beTe

zimmedari jo mili us ko nibhao beTe

kyun-ki talim tumhaare liye hai kuchh aur hai ab

mere har roz jagane ka hai kuchh aur sabab

ek taraf apna ye uljha dil-e-nashad rakho

tum principal ho ye ek baat sada yaad rakho